Գյումրիում անցկացված երթի մասնակիցներից մեկի մոտ թմրամիջոց է հայտնաբերվել, մյուսի մոտ՝ դանակ

Հունիսի 25-ին Գյումրիում անցկացված՝ էլեկտրաէներգիայի թանկացման դեմ ուղղված բողոքի երթի ժամանակ ոստիկանության Կումայրիի բաժնի ծառայողները Գարեգին Նժդեհի փողոցի թիվ 68 շենքի մոտից, ոգելից խմիչք օգտագործած վիճակում, Մուշի բաժին բերման են ենթարկել երթի մասնակից, 1972 թ. ծնված Ներսես Ա.-ին:
Խուզարկությամբ նրա մոտ հայտնաբերվել և առգրավվել է մարիխուանա թմրամիջոցի նմանվող զանգված:
Ներսես Ա.-ն հայտարարել է, որ հայտնաբերվածը պատկանում է իրեն, մարիխուանա թմրամիջոց է, որը պատրաստել է ծխելու համար:
Նույն երթի մեկ այլ մասնակցի, ոգելից խմիչք օգտագործած վիճակում, ոստիկանության ծառայողները բերման են ենթարկել Վազգեն Սարգսյան փողոցի թիվ 10 շենքի մոտից: Ոստիկանության Մուշի բաժին բերման ենթարկվածը 1972 թ. ծնված Սամվել Զ.-ն է:
Խուզարկությամբ նրա մոտ հայտնաբերվել և առգրավվել է ծալովի դանակ:
Երկու դեպքերով էլ նշանակվել են համապատասխան փորձաքննություններ և կատարվում է հետաքննություն: