Ամանորի հրաշք՝ ՆԳՆ Մշակույթի կենտրոնի նախաձեռնությամբ

Ամանոր, նոր սպասելիքներ, նոր նպատակներ ու երազանքներ, Ամանորի հրաշքի սպասում և, իհարկե, մանուկների զվարթ ծիծաղ, գունազարդ դահլիճ, գեղեցիկ հեքիաթ, նվերներ, Ձմեռ պապ ու Ձյունանուշ:
ՆԳՆ Մշակույթի կենտրոնի նախաձեռնությամբ՝ Գաբրիել Սունդուկյանի անվան մայր թատրոնում հեքիաթային միջավայր ու տոնական հրաշալի տրամադրություն էր: Երեխաների համար բեմադրվել էր «Մոխրոտիկը» հեքիաթն իր ողջ գունագեղությամբ ու ժամանակակից լուսաձայնային լուծումներով: Հանդիսատեսը ՆԳՆ ենթակա ստորաբաժանումների ծառայողների երեխաներն էին:
Ներքին գործերի նախարարությունում երբեք չեն մոռանում նաև մանկատան սաներին: «Մոխրոտիկը» ներկայացումը դիտելու էին եկել նաև «ՍՕՍ Մանկական գյուղեր» հայկական բարեգործական հիմնադրամի փոքրիկները:
ՆԳ նախարարությունն իր ամենօրյա ուշադրությամբ և գործերով բազմիցս է ապացուցել, որ երեխաների կողքին է ու նրանց պաշտպանը: Եվ որպեսզի երեխաները ուրախ տրամադրությամբ հեռանային թատրոնից, ներկայացման վերջում Ձմեռ պապի կողմից նրանց հանձնվեցին գեղեցիկ նվերներ:
2024 թվականը թող խաղաղ ու բարեբեր տարի լինի: