Վարդենիսի ոստիկանները անասնագողության դեպք են բացահայտել
![Վարդենիսի ոստիկանները անասնագողության դեպք են բացահայտել Վարդենիսի ոստիկանները անասնագողության դեպք են բացահայտել](/timthumb?src=/resources/police/img/news/big/1664178156-839.jpeg&q=75&w=780&wm=1)
Սեպտեմբերի 24-ի առավոտյան 1-02 ծառայություն էր զանգել Սոթք գյուղի մի բնակիչ. նա նկատել էր, որ իրենց գոմի ոչխարներից 8-ը չկան:
Գյուղ էր մեկնել ոստիկանության Վարդենիսի բաժնի օպերատիվ խումբը: Վարդենիսի քննչական բաժնում նախաձեռնվել էր քրեական վարույթ:
Վարդենիսի քրեական հետախույզները օպերատիվ-հետախուզական միջոցառումներով ստացած տեղեկությունն իրացրին ոստիկանության Մալաթիայի բաժնի ծառայողների հետ: Սեպտեմբերի 25-ի երեկոյան Երևանում հայտնաբերվեց, գողությունը կատարելու կասկածի հիմքով ձերբակալվեց և իր վարած «ԳԱԶ» մակնիշի մեքենայով հանդերձ, Վարդենիսի բաժին տեղափոխվեց Նոր Խարբերդում հաշվառված և մայրաքաղաքում բնակվող 31-ամյա մի տղամարդ:
Հանցագործության միջոց մեքենան տեղափոխվել է պահպանվող հատուկ տարածք, իսկ տղամարդը` Վարդենիսի քննչական բաժին, որտեղ էլ տվել է խոստովանական ցուցմունք:
Գողացված ոչխարներից 6-ը հայտնաբերվել և վերադարձվել են տիրոջը: Ձեռնարկվում են միջոցառումներ՝ գողոնի մյուս մասը հայտնաբերելու ուղղությամբ:
Կատարվում է նախաքննություն:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: