Մեկնարկել են անչափահասներին թմրամիջոցներից զերծ պահելու նպատակով իրականացվող հանդիպում-քննարկումներ

Անչափահասներին թմրամիջոցներից և հոգեմետ նյութերից զերծ պահելու նպատակով ՆԳՆ ոստիկանության ՀԱԱԳՎ անչափահասների հանցավորության և ընտանիքում բռնության կանխարգելման վարչությունը, ինչպես նաև Քրեական ոստիկանության թմրամիջոցների անօրինական շրջանառության դեմ պայքարի վարչությունը, համագործակցելով ԿԳՄՍ նախարարության գործընկերների հետ, մարտի 15-ից մայրաքաղաքի ավագ դպրոցներում անցկացնում են հանդիպում-քննարկումներ։ Հերթական այցը մարտի 22-ին էր՝ Արաբկիրի թիվ 54 ավագ դպրոցում։ Ոստիկանները դպրոցի տնօրինության, մանկավարժների և ծնողական կոմիտեների ներկայացուցիչների հետ զրուցեցին թմրամոլության վնասակարության, կախվածության ու դրանցից բխող հանցավոր հետևանքների մասին։ Այդ համատեքստում մանրամասնեցին անչափահասներին թմրամիջոցների անօրինական շրջանառության մեջ ներգրավելու արատավոր երևույթի, ինչպես նաև քրեական պատասխանատվության մասին։ Ներկաները բարձրաձայնեցին իրենց հուզող հարցերը, որոնք դարձան ակտիվ քննարկման առարկա։ Նմանօրինակ միջոցառումները շարունակական են։