Ավտոմեքենաներից գողություններ կատարողը հայտնաբերվել է

Քրեական հետախուզության գլխավոր վարչությունում ստացված օպերատիվ տեղեկություններն իրացնելիս, գողություն կատարելու կասկածանքով, նոյեմբերի 29-ին ոստիկանության Երևան քաղաքի վարչության Արաբկիրի բաժին բերման է ենթարկվել Երևան քաղաքի Ա. Ավետիսյան փողոցի 76 շենքի 15 բնակարանի բնակիչ, 1989 թ. ծնված Հարություն Անտոնյանը:

Պարզվել է, որ նա նոյեմբերի սկզբներին, տեխնիկական միջոցների գործադրմամբ, գաղտնի հափշտակել է Ազատության պողոտայի 16 շենքի մոտ կայանված, Երևան քաղաքի Ազատության պողոտայի 12 շենքի 45 բնակարանի բնակիչ Վ.-ին պատկանող «BMW X 5» մակնիշի ավտոմեքենայի կողային հայելիները` պատճառելով շուրջ 200.000 ՀՀ դրամի նյութական վնաս: 

 Ձեռնարկված միջոցառումների շնորհիվ Հ. Անտոնյանը խոստովանել է նաև իր կողմից կատարված նմանատիպ գողության ևս 8 դեպք:  

Կատարվում է նախաքննություն: