Արաբկիրի ոստիկանները կասկածանքով երկու երիտասարդի են բերման ենթարկել

«Հետախուզում-2019» օպերատիվ-կանխարգելիչ միջոցառման շրջանակներում հունիսի 11-ին, ժամը 05.40-ին, ոստիկանության Արաբկիրի բաժնի ծառայողները շրջագայություն կատարելիս Տիգրանյան փողոցից, ապօրինի թմրամիջոց պահելու և օգտագործելու կասկածանքով, «ԲՄՎ» մակնիշի ավտոմեքենայով հանդերձ՝ բերման են ենթարկել 26-ամյա վարորդին և նրա 27-ամյա ընկերոջը:
Ավտոմեքենայի զննությամբ սրահից հայտնաբերվել է մարիխուանա տեսակի թմրամիջոցի նմանվող դեղնականաչավուն զանգված՝ 10,54 գ կշռով, օգտագործված 4 կաթոցիչ, որոնց ապակյա սրվակների պատերին առկա էր մոխրացված զանգված և 3 կաթոցիչի գլխիկ:
Նշանակվել են դատանյութագիտական և տոկսիկոքիմիական փորձաքննություններ:
Նախապատրաստվում են նյութեր:

***

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: