Գավառի ոստիկանները բնակարանային գողություններ են բացահայտել

Փետրվարի 22-ին բնակարանային գողության վերաբերյալ հաղորդում ստացվեց ոստիկանության Գավառի բաժնում: Գավառ քաղաքի բնակիչ տանտերերը բացակայել էին նախորդ օրվա երեկոյան ժամը յոթից մինչև գիշերվա երեքը: Վերադառնալով՝ տեսել էին պատուհանը բաց, իսկ ոտնահետքերը տանում էին դեպի պահարան, որի դարակից էլ գողացել էին ոսկյա զարդեր:
Բաժնի օպերատիվ խումբն իրականացրեց անհրաժեշտ գործողություններ, սակայն հանցագործությունը թարմ հետքերով բացահայտել չհաջողվեց:
Նախաձեռնվեց քրեական վարույթ: Քրեական հետախույզները ձեռնարկեցին օպերատիվ-հետախուզական միջոցառումներ, մշակեցին վարկածներ, որոնցից հավանականն այն էր, որ տուն մտնողները տեղացի են, անցուդարձին ծանոթ:
Մինչ մշակվում էին վարկածները, մարտի 9-ին ստացվեց նմանատիպ նոր հաղորդում` դարձյալ Գավառ քաղաքի բնակչից: Այս անգամ տանտերերը բացակայել էին երեկոյան տասն անց կեսից մինչև գիշերվա մեկն անց կես: Այս անգամ ևս տեխնիկական միջոցներով բացել էին առանձնատան երկրորդ հարկի պատուհանը և ննջարանի պահարանից գողացել ոսկյա զարդեր ու 120 հազար դրամ:
Բաժնի օպերատիվ խումբը մեկնեց դեպքի վայր, ձեռնարկեց անհրաժեշտ միջոցառումներ ու դարձյալ արագ արդյունք չեղավ: Իսկ քրեական հետախույզների վարկածը, որ երկրորդ դեպքում էլ բնակարան մտել էին տեղանքին ծանոթ մարդիկ` դարձավ ավելի հավանական: Կասկածելիների շրջանակը գնալով սեղմվում էր:
Ոստիկանության Գավառի բաժնի և Գեղարքունիքի մարզային վարչության քրեական հետախույզների ձեռնարկած օպերատիվ-հետախուզական միջոցառումների և մարզային քննչական վարչության ծառայողների քննչական գործողությունների արդյունքը ստացվեց ապրիլի 3-ին՝ հետևողական աշխատանքի շնորհիվ: Ձեռք բերվեցին հիմնավոր ապացույցներ, որ երկու դեպքում էլ բնակարանային գողությունը կատարել էին Գավառ քաղաքի բնակիչ, 33 և 37 տարեկան երկու տղամարդիկ: Նույն օրը երկուսն էլ հայտնաբերվեցին, ձերբակալվեցին և ներկայացվեցին Գեղարքունիքի մարզային քննչական վարչություն:
Դատարանի որոշմամբ երկուսն էլ կալանավորվել են: Ձեռնարկվում են միջոցառումներ՝ գողոնը հայտնաբերելու ուղղությամբ: Նախաքննությամբ հանգամանքները պարզվում են: