Վաղարշապատի բաժնի ոստիկանները գողությունների դեպքեր են բացահայտել

Հունվարի 30-ին ոստիկանության Վաղարշապատի բաժնում հաղորդում տված քաղաքացին հայտնել էր, որ հունվարի 29-ի ժամը 22.00-ից հունվարի 30-ի ժամը 13.30-ն ընկած ժամանակահատվածում անհայտ անձինք ապօրինի մուտք են գործել Պտղունք գյուղի դպրոցի նորակառույց չգործող շենք և գողացել էլեկտրական ջրատաքացուցիչ և պանելային մարտկոցներ:
Բաժնի քրեական հետախույզների, համայնքային ոստիկանների և ՔՈԳՎ ծառայողների համատեղ ձեռնարկած միջոցառումների արդյունքում պարզվել է, որ հանցագործությունը կատարել են մայրաքաղաքի 29 և 38 տարեկան երկու բնակիչ:
Ձեռնարկված միջոցառումների շնորհիվ նրանք փետրվարի 2-ին մայրաքաղաքի տարբեր փողոցներում հայտնաբերվել, ձերբակալվել և տեղափոխվել են Վաղարշապատի բաժին, որտեղ տվել են խոստովանական ցուցմունք:
Հետագա միջոցառումների արդյունքում բացահայտվեց նաև նախկինում կատարված գողության մեկ այլ դեպք:
2022 թ. հուլիսի 27-ին ոստիկանության Վաղարշապատի բաժնում հաղորդում տված քաղաքացին հայտնել էր, որ ժամը 01.00-ից ժամը 14.00-ի սահմաններում Պտղունք գյուղի Ագաթանգեղոսի փողոցի իր տնից գողացել են ջեռուցման մարտկոցներ և շինարարական գործիքներ:
Նախաձեռնված քրեական վարույթի շրջանակում իրականացված միջոցառումների արդյունքում Վաղարշապատի բաժնի ծառայողները պարզեցին, որ նշված բնակարանային գողությունը կատարել է 38-ամյա տղամարդը:
Նախաքննությունը շարունակվում է: