Երևան քաղաքի վարչության ծառայողները գրպանահատության դեպք են բացահայտել

Հուլիսի 12-ին, ժամը 19.05-ին, ոստիկանության Արաբկիրի բաժնում 50-ամյա մի կին տվել էր հաղորդում, որ մոտ մեկ ժամ առաջ երթուղային ավտոբուսում իր պայուսակից գողացել են դրամապանակը, մեջը` փող, վարորդական իրավունքի վկայական, նույնականացման քարտ և այլն:
Հանցագործության մասին տեղեկացվել են ոստիկանության Երևան քաղաքի վարչության քրեական հետախուզության բաժնի գրպանահատության դեմ պայքարի բաժանմունքի ծառայողները, որոնց ձեռնարկած օպերատիվ-հետախուզական միջոցառումների շնորհիվ էլ գողությունն արագ բացահայտվեց: Ահազանգից րոպեներ անց Բաղրամյան պողոտայում ձերբակալվեց և Արաբկիրի բաժին տեղափոխվեց Դավիթաշենի 4-րդ թաղամասի բնակիչ, 23-ամյա մի երիտասարդ: Նրա խուզարկությամբ հայտնաբերվեց նշված դրամապանակը` ողջ պարունակությամբ:
Երիտասարդը ներկայացվել է Արաբկիրի քննչական բաժին: Նախաքննությամբ հանգամանքները պարզվում են: