Դիտահորերից թուջե կափարիչներ գողացողին հայտնաբերեցին

Ապրիլի 19-ին ոստիկանության Սպիտակի բաժնում հաղորդում էր ստացվել, որ Սպիտակի Ա. Մանուկյան փողոցում գտնվող դիտահորերի վրայից գողացել են թուջե 2 կափարիչ` պատճառելով 50.000 դրամի նյութական վնաս:
Բաժնի ծառայողների ձեռնարկած օպերատիվ-հետախուզական միջոցառումների շնորհիվ, նշված գողությունը կատարելու կասկածանքով, իր բնակարանից բերման է ենթարկվել 1963 թ. ծնված Վազգեն Պ.-ն:
Պարզվել է, որ նա ապրիլի 18-ին, ժամը 01.00-ի սահմաններում, Ա. Մանուկյան և Ն. Աճեմյան փողոցների խաչմերուկի հարևանությամբ գտնվող դիտահորի վրայից գողացել է դիտահորի կափարիչը և իր «ԳԱԶ-3102311» մակնիշի ավտոմեքենայով տեղափոխել իր տան բակ:
Ձեռնարկված միջոցառումների շնորհիվ պարզվել է նաև, որ նա ապրիլի 19-ին, ժամը 01.30-ի սահմաններում, Ա. Մանուկյան փողոցի և Շիրակի խճուղու խաչմերուկի հարևանությամբ գտնվող դիտահորի վրայից գողացել է դիտահորի կափարիչ և ավտոմեքենայով տեղափոխել տան բակ:
Գողոնն առգրավված է:
Կատարվում է հետաքննություն: