ԵԱՀԿ պատվիրակությունը ՀՀ ոստիկանությունում

20.04.2012 16:13 ԵԱՀԿ-ՀՀ ոստիկանություն

2012 թ. ապրիլի 20-ին ՀՀ ոստիկանության պետի տեղակալ, ոստիկանության գեներալ-մայոր Արթուր Օսիկյանն ընդունեց ԵԱՀԿ պատվիրակությանը և ներկայացրեց զանգվածային միջոցառումների ժամանակ ոստիկանության գործողությունների ուղեցույցի լրամշակված ու վերջնական տարբերակը:

Անդրադառնալով ուղեցույցի նշանակությանն ու պատրաստման ընթացքին՝ Արթուր Օսիկյանը բարձր գնահատեց ԵԱՀԿ և Ջի Այ Զեթ կազմակերպության փորձագետների ակտիվ մասնակցությունը փաստաթղթի պատրաստմանը և վստահեցրեց, որ փոխգործակցությունը կշարունակվի՝ արդեն իսկ շրջանառության մեջ դրված փաստաթղթի հետագա կատարելագործման նպատակով:

Ջերմ ու կառուցողական հանդիպման ընթացքում հայ գործընկերները անակնկալ էին պատրաստել Ոստիկանության հարցերով ԵԱՀԿ միջազգային փորձագետ Դեյվիդ Այենսոնի համար: ՀՀ ոստիկանության հետ սերտ համագործակցելու, համայնքային ոստիկանության և հասարակական կարգի ապահովման ոլորտներում ոստիկանությանը գործնական աջակցություն ցուցաբերելու, ինչպես և ոստիկանության ծառայողների համար երկարաժամկետ մասնագիտական վերապատրաստման դասընթացներ կազմակերպելու համար Դեյվիդ Այենսոնը ՀՀ ոստիկանության պետ, գեներալ-լեյտենանտ Վլադիմիր Գասպարյանի հրամանով պարգևատրվեց «Համագործակցության ամրապնդման համար» մեդալով:

Շնորհավորելով պարգևատրման առթիվ՝ Վլադիմիր Գասպարյանը համոզմունք հայտնեց, որ ոստիկանության բարեփոխման ոլորտում համագործակցությունը կշարունակվի և արդյունավետ աշխատանք մաղթեց Այենսոնին ու գործընկերներին:

Դեյվիդ Այենսոնը շնորհակալություն հայտնեց իր աշխատանքի գնահատման համար՝ նշելով, որ ՀՀ ոստիկանության մեդալով պարգևատրվելը մեծ պատիվ և իրադարձություն է:

ԵԱՀԿ պատվիրակությունը ՀՀ ոստիկանությունում

ՀԻՄՆԱԿԱՆ