Ապօրինի զենք-զինամթերք և թմրանյութ պահելու և օգտագործելու դեպքեր. Վաղարշապատի ոստիկանների բացահայտումները

Ոստիկանության Վաղարշապատի բաժնի քրեական հետախույզները, օպերատիվ տեղեկություններն իրացնելով, դեկտեմբերի 6-ին, ժամը 19-ի սահմաններում, Թաիրով գյուղի Մայրաքաղաքային փողոցում հայտնաբերել, թմրանյութ պահելու և օգտագործելու կասկածանքով ձերբակալել և բաժին են տեղափոխել Արմավիր քաղաքի 51-ամյա մի բնակչի: Նրա խուզարկությամբ հայտնաբերվել են հաբ, ծալովի դանակ և ներարկիչ: Տղամարդը հայտնել է, որ հայտնաբերվածը սուբուտեքս է, որը գնել է տելեգրամյան ալիքներից մեկով:

Վաղարշապատի բաժնի քրեական հետախույզներն օպերատիվ տեղեկություններ էին ստացել, որ մայրաքաղաքի 37-ամյա մի բնակիչ Էջմիածնի գործարաններից մեկի իր աշխատասենյակում ապօրինի զենք-զինամթերք է պահում: Նույն օրը նշված վայրի զննությամբ հայտնաբերվել են «ԱԿ-74» ինքնաձիգ և 7,62 մմ տրամաչափի ինքնաձիգի 476 փամփուշտ:
Կազմված փաստաթղթերն ուղարկվել են Վաղարշապատի քննչական բաժին: Հանգամանքները նախաքննությամբ պարզվում են: