Ընդերքի պահպանման կամ օգտագործման պահանջների հերթական խախտում. Անիի ոստիկանների բացահայտումը

Անիի քրեական հետախույզները ստացել էին օպերատիվ տվյալ, որ Բագրավան գյուղի վարչական տարածքում գյուղնշանակության հողատարածքն օգտագործվում է արդյունահանման նպատակով:
Հետագա միջոցառումներով պարզվել է, որ 2013 թ. սահմանափակ պատասխանատվությամբ ընկերություններից մեկին վարձակալական հիմունքներով հատկացվել է 4,4 հեկտար մակերեսով տարածք, սակայն ընկերությունը արդյունաբերական գործունեություն է ծավալել նաև այդ տարածքից դուրս` գյուղատնտեսական նշանակության հողերում:
Մայիսի 20-ին Անիի համայնքապետարանից ստացված փաստաթղթերի ուսումնասիրմամբ պարզվել է նաև, որ այս ընթացքում սահմանափակ պատասխանատվությամբ ընկերության 100 տոկոս բաժնեմասը վաճառվել է, և մարտ ամսին կնքնվել է հողամասի վարձակալության նոր պայմանագիր:
Կազմված փաստաթղթերն ուղարկվել են Արթիկի և Անիի քննչական բաժին: Հանգամանքները պարզվում են: