Մասիսի ոստիկանները թարմ հետքերով բացահայտեցին գողությունը

Փետրվարի 22-ի առավոտյան ոստիկանության Մասիսի բաժնում գողության վերաբերյալ ստացվեց հաղորդում: Սահմանափակ պատասխանատվությամբ ընկերության աշխատակիցը հայտնում էր, որ գիշերը մտել են ընկերության տարածք, բաց պատուհանով անցել արտադրամաս, որտեղից էլ ապամոնտաժել ու գողացել են զոդման սարքերի մալուխներ:
Բաժնի օպերատիվ խումբը մեկնեց դեպքի վայր: Գողության պահը ֆիքսել էր տեսահսկող սարքը, ինչը կարող էր նպաստել արագ բացահայտմանը: Տեսագրությունն ուսումնասիրվեց: Պարզվեց միայն, որ դեպքը կատարվել է գիշերվա ժամը երեքին, և արտադրամաս մտել են երկու մարդ:
Մասիսի քրեական հետախույզներն անցան օպերատիվ միջոցառումների իրականացմանը: Հանցագործությունն արագ բացահայտվեց: Ստացվեց տեղեկություն, որ տեսագրությունում երևացող երկուսից բացի, հանցագործությանը մասնակցել են ևս երկու տղամարդ: Նույն օրը, մինչև երեկոյան ժամը 7-ը, հայտնաբերվեցին ու ոստիկանության Մասիսի բաժին բերման ենթարկվեցին Հայանիստ գյուղի բնակիչ, 22-ամյա մի երիտասարդ և Մասիս քաղաքի 44- ամյա մի բնակիչ: Եվս մեկ 30-ամյա հայանիստցի հրավիրվեց բաժին:
Հարուցված քրեական գործի շրջանակներում ձեռնարկված միջոցառումների արդյունքում երեքն էլ խոստովանել են: Նաև հայտնել են, որ գողոնը վերամշակել ու հանձնել են գունավոր մետաղների ընդունման կետ:
Ձեռնարկվում են միջոցառումներ` հանցագործության չորրորդ մասնակցին հայտնաբերելու ուղղությամբ: Դեպքի հանգամանքները քննությամբ պարզվում են: