Ոստիկանության Նաիրիի բաժնի ծառայողները առանձնապես խոշոր չափի թմրամիջոց են հայտնաբերել

Ոստիկանության Նաիրիի բաժնի ծառայողները, հետախուզական միջոցառումների արդյունքում, ապօրինի թմրաշրջանառության վերաբերյալ տեղեկություններ ձեռք բերեցին, իսկ արդեն սեպտեմբերի 9-ին բաժնում հարուցված  քրեական գործի շրջանակներում խուզարկեցին Քասախ գյուղի 34-ամյա մի բնակչի տունը։ Արդյունքում՝ հայտնաբերվեցին տարբեր տարաներով ու պոլիէթիլենային տոպրակների մեջ փաթեթավորված՝ ընդհանուր 345 գրամից ավելի մանրացված-չորացված, մարիխուանայի նմանվող զանգվածներ, տան հողամասում՝ մշակված կանեփի բույսեր, որոնցից մի քանիսը՝ ծաղկամանով։ Հայտնաբերվածն առգրավվել ու փաթեթավորվել է։ Նշանակվել է փորձաքննություն։ Հարուցված քրեական գործի նախաքննությունը շարունակվում է։