Արմավիրի ոստիկանները հայտնաբերել են թմրանյութ իրացրած տղամարդուն. նա կալանավորվել է

Ոստիկանության Արմավիրի մարզային վարչության քրեական հետախույզներն ապօրինի թմրաշրջանառության վերաբերյալ օպերատիվ տվյալներն իրացրին Արմավիրի բաժնի և Ճանապարհային ոստիկանության 2-րդ սպայական գումարտակի գործընկերների հետ։ Նրանք ուժեղացված ծառայության ժամանակ Սարդարապատ գյուղում ձերբակալեցին և, մեքենայով հանդերձ,  ոստիկանության Արմավիրի բաժին տեղափոխեցին Նորապատ գյուղի 20-ամյա երկու բնակչի: Երիտասարդներից մեկի մոտ մարիխուանայի նմանվող զանգված կար։ Իրավապահների տեղեկություններով՝ նա թմրամիջոցը ձեռք էր բերել Լենուղի գյուղի մի բնակչից։ Նրանք հայտնաբերեցին, ձերբակալեցին և բաժին տեղափոխեցին 48-ամյա տղամարդուն։ Նրա խուզարկությամբ հայտնաբերվեցին ընդհանուր 6 գրամից ավելի մարիխուանայի նմանվող զանգվածներով փաթեթներ ու կաթուցիչ։ 48-ամյա տղամարդը կալանավորվել է։ Նա ներկայացվել է տարածքային քննչական վարչություն, որտեղ էլ նախաձեռնվել է քրեական վարույթ։ Հանգամանքները պարզվում են։