Ծառայություն` օրենքին, ժողովրդին ու պետությանը (ՏԵՍԱՆՅՈՒԹ)
15.04.2013 17:51
Ակնարկներ վետերանների մասին
![Ծառայություն` օրենքին, ժողովրդին ու պետությանը (ՏԵՍԱՆՅՈՒԹ) Ծառայություն` օրենքին, ժողովրդին ու պետությանը (ՏԵՍԱՆՅՈՒԹ)](/timthumb?src=/resources/police/img/news/big/1366034026,7146.jpeg&q=75&w=780&wm=1)
90-ամյա գնդապետ Նիկոլայ Մելիքջանյանը հետաքրքիր, կիրթ մարդ է: Ժամանակին նրան իր սպասարկած ոլորտի թիվ մեկ ոստիկան էին կոչում: Օրենքին, հասարակական կարգի պահպանման ու հանցագործությունների կանխարգելման գործին ծառայությունը նրա համար հավատամք է եղել, համազգեստ կրելը` պատիվ: Հիշողություններն ամփոփող լուսանկարները, կուրծքը զարդարող բազմաթիվ մեդալները, պատվոգրերը նրա հարուստ կենսագրության խոսուն վկայություններ են:
«Ոստիկանի խաչը ծանր է, ծառայությունը` բարդ, վտանգավոր: Ոստիկան լինելը կոչում է, որ պարտավոր ես պատվով կրել` եթե քեզ նման բախտ է վիճակվել»,- ասում է Նիկոլայ Մելիքջանյանը: Հայրենական մեծ պատերազմ, այնուհետեւ` 15 տարի ծառայություն բանակում, ապա` ներքին գործերի նախարարություն: Նորից ծառայություն` արդեն հասարակական կարգի պահպանության:
Երեւանի ներքին գործերի վարչության արտաքին ծառայության խստապահանջ ղեկավար Նիկոլայ Մելիքջանյանի շնորհիվ հայ ոստիկանի մասին գովեստով են խոսել մայրաքաղաքի բնակիչներն ու հյուրերը: Հանրապետության եւ ներքին գործերի նախարարության ղեկավարությունը վստահ էր` հասարակական կարգի պահպանումը հուսալի ձեռքերում է: «Զավակս, մեծ ընծա ունես ինձմե ստանալու»,- Ավետիք Իսահակյանի թաղման արարողության ժամանակ իրեն ուղեկցող Նիկոլայ Մելիքջանյանին գոհունակությունն այսպես է հայտնել Ամենայն Հայոց կաթողիկոս Վազգեն Առաջինը:
Մելիքջանյանի հիշողության մեջ անջնջելի են մնացել նաեւ անվանի զորավար Հովհաննես Բաղրամյանի ուղեկցումները: «Իսկական ժողովրդական մարդ էր»,- ասում է:
Հիշողություններ, հիշողություններ...
Հիշում է, ոգեւորվում, հուզվում...
Միշտ շարքում լինելու վճռականությամբ է շարունակում ապրել Նիկոլայ Մելիքջանյանը` ձիգ, շիտակ, հպարտ` ինչպես զինվոր: Այդպես ողջ կյանքն է ապրել, որ ծառայություն է եղել օրենքին, ժողովրդին ու պետությանը:
«Պետք է ապրել այնպես, որ հետո չամաչես մարդկանց աչքերին նայել, որ հարգանք ու պատիվ պայմանավորված չլինեն միայն պաշտոնովդ»,- ասում է վետերան ոստիկանը:
Կոլյա պապիկն այսօր էլ հարգված մարդ է, նրան սիրում են շենքի մեծ ու փոքր. «Նա բոլորիս կողմից հարգված մարդ է, մեր երկրի համար շատ գործեր է արել»,- ասում են հարեւանները:
Հանուն օրինականության, հանուն մարդու եւ հասարակության իրավունքների պաշտպանության. համառոտ այսպես կարելի է բնորոշել գնդապետ Նիկոլայ Մելիքջանյանի անցած ուղին, ով պարզապես իր հարազատ համակարգի զինվորն է եղել:
ՏԵՍԱՆՅՈՒԹ