Կապանի ոստիկանները հայտնաբերել են խանութի պահեստ մտած անձին (ՏԵՍԱՆՅՈՒԹ)

Հուլիսի 18-ին, ժամը 11․40-ին, ոստիկանության Կապանի բաժնում հաղորդում է ստացվել, որ Կապանի Ավետիսյան փողոցում գտնվող պահեստ մարդ է մտել։
Անմիջապես դեպքի վայր են մեկնել օպերատիվ խմբի ոստիկանները։ Ըստ տուժողի՝ ժամը 11։30-ի սահմաններում անհայտ անձը բացել է շենքի տակ գտնվող խանութի պահեստարանի դռան փականն ու ներս մտել։ Սակայն նկատելով խանութպանին՝ փախուստի էր դիմել։
Ոստիկանները տուժողից հաղորդում են ընդունել։ Կատարվածը բացահայտելու ուղղությամբ քրեական հետախույզները ձեռնարկել են օպերատիվ-հետախուզական միջոցառումներ, և շուտով պարզվել է պահեստ մտած անձի ինքնությունը։ Կապանում ապրող 17-ամյա մի պատանի էր, որը նույն օրը հայտնաբերվել և բերման է ենթարկվել բաժին։ Նա տվել է խոստովանական բացատրություն։ Հայտնել է նաև, որ մոտ մեկ ամիս առաջ էլի է մտել նույն պահեստն ու ծխախոտ գողացել։ Հուլիսի 1-ին էլ փորձել է մտնել, բայց իր կամքից անկախ հանգամանքներում մտածածն ավարտին չի հասցրել։
Դեպքի հանգամանքները պարզվում են։
Կատարվում է քննություն։