Կարևորվեց Ինտերպոլի ԱԿԲ-ի և ոստիկանության տարածքային ստորաբաժանումների միջև համագործակցությունը

Ապրիլի 30-ին ՀՀ ոստիկանության կոլեգիայի նիստերի դահլիճում տեղի ունեցավ Հայաստանի Հանրապետությունում Ինտերպոլի ազգային կենտրոնական բյուրոյի հետ համագործացություն իրականացնող ֆունկցիոնալ պատասխանատու կապի  սպաների սեմինար-հանդիպումը: 

Հանցավորության դեմ պայքարի գործում կարեւորելով ոստիկանության Ինտերպոլի ԱԿԲ-ի և տարածքային ստորաբաժանումների միջեւ համագործակցությունը` ոստիկանության պետի տեղակալ, ոստիկանության գեներալ-մայոր Հունան Պողոսյանը նշեց, որ այսօր այդ համագործակցությունը դեռեւս բավարար հիմքերի վրա չէ. «Համագործակցությունը չպետք է  տարվի միայն  հետախուզական աշխատանքներով, այն պետք է  առավել ընդգրկուն, առավել արդյունավետ լինի բոլոր  առումներով»,- ասաց նա: 

Արդյունավետ համագործակցության անհարժեշտության մասին խոսեց նաեւ  ոստիկանության շտաբի պետ Վարդան Եղիազարյանը: «Ինտերպոլի  բյուրոն անվերջ զարգանում է,  ուրեմն անհրաժեշտ են համագործակցության նոր  եզրեր, նոր մոտեցումներ»: 

Հայաստանի Հանրապետությունում  Ինտերպոլի ազգային կենտրոնական բյուրոյի պետ Արա Ֆիդանյանի  ելույթից հետո  ցուցադրվեց Ինտերպոլի մասին պատմող ֆիլմ: 

Սեմինար-հանդիպման ժամանակ ելույթ ունեցողները խոսեցին նաեւ Ինտերպոլի ուղիներով իրականացվող միջազգային  հետախուզման, առեւանգված տրանսպորտային միջոցների հայտնաբերման եւ այլ հարցերի շուրջ: