Էրեբունու քրեական հետախույզները մեքենաների հայելիների գողություններ են բացահայտել. գողոնը հայտնաբերվել է

Ոստիկանության Էրեբունու բաժնի քրեական հետախույզները գողության վերաբերյալ տեղեկություն էին ստացել, որն իրացրին փետրվարի 27-ին: Նրանք առավոտյան ժամը վեցին Ռոստովյան փողոցում հայտնաբերեցին ու, գողություն կատարելու կասկածանքով, բերման ենթարկեցին Արարատի մարզի Նորամարգ գյուղի բնակիչ, 36-ամյա մի տղամարդու: Կասկածանքը հիմնավոր էր։ Բերման ենթարկվելուց կես ժամ առաջ 36-ամյա տղամարդը Ռոստովյան փողոցում կայանված արտասահմանյան համարանիշերով «Լեքսուս» մակնիշի մի մեքենայից գողացել էր կողային հայելիները՝ պատճառելով 400 հազար դրամի վնաս:
Գողոնը հայտնաբերվել և վերադարձվել է տիրոջը:
Էրեբունու բաժնի քրեական հետախույզները գողության դեպք բացահայտեցին նաև մարտի լույս 4-ի գիշերը։ Նրանք Սարի թաղի 5-րդ փողոցից, գողություն կատարելու կասկածանքով, բերման են ենթարկել 20-ամյա երիտասարդի: Նա տվել է խոստովանական բացատրություն, որ ժամը 04.00-ի սահմաններում գողացել է Խորենացու փողոցում կայանված «Նիսանի» կողային հայելիների ապակիները:
Երիտասարդի անձնական խուզարկությամբ գողոնը հայտնաբերվել է:
Դեպքերի հանգամանքները քննությամբ պարզվում են։