Հայր ու որդի դանակահարվել էին. Քանաքեռ-Զեյթունի ոստիկանների բացահայտումը

Նոյեմբերի 18-ին «Միքայելյան վիրաբուժության ինստիտուտից» ոստիկանության Քանաքեռ-Զեյթունի բաժին ահազանգ ստացվեց: Որովայնի առաջնային պատի կտրած-ծակած, թափանցող վերքով իրենց մոտ էր տեղափոխվել Քանաքեռի 45-ամյա մի բնակիչ: Նրա հայտնածով՝ վնասվածքը ստացել էր Քանաքեռի գերեզմանատանն ընկնելու հետևանքով: Րոպեներ անց «Սուրբ Գրիգոր Լուսավորիչ» բժշկական կենտրոնից ոստիկանության Քանաքեռ-Զեյթունի բաժին ահազանգ ստացվեց, որ իրենց մոտ է տեղափոխվել Քանաքեռի բնակիչ, 22-ամյա մի երիտասարդ՝ բազմաթիվ կտրած-ծակած վերքերով։ Նա հայտնել էր, որ մարմնական վնասվածքները ստացել է Քանաքեռում ընկելու հետևանքով: Երիտասարդը «Միքայելյան վիրաբուժության ինստիտուտ» տեղափոխված տղամարդու որդին էր։
Ոստիկանության Երևան քաղաքի վարչության և Քանաքեռ-Զեյթունի բաժնի քրեական հետախույզները, օպերատիվ տվյալներն իրացնելով, դեպքից ժամեր անց Քանաքեռի 6-րդ փողոցում ձերբակալել և Քանաքեռ-Զեյթունի բաժին են տարել 18-ամյա մի երիտասարդի: Նա իրավապահներին հայտնել է, որ իր և տուժողների միջև վեճ է ծագել, որի ժամանակ ինքը դանակահարել է նրանց:
Դեպքի հանգամանքները նախաքննությամբ պարզվում են: