Հարցազրույց ոստիկանության վետերանների խորհրդի նախագահ, ոստիկանության պետի խորհրդական Գրիգոր Աբովյանի հետ
![Հարցազրույց ոստիկանության վետերանների խորհրդի նախագահ, ոստիկանության պետի խորհրդական Գրիգոր Աբովյանի հետ Հարցազրույց ոստիկանության վետերանների խորհրդի նախագահ, ոստիկանության պետի խորհրդական Գրիգոր Աբովյանի հետ](/timthumb?src=/resources/police/img/news/big/1398519708,4684.jpeg&q=75&w=780&wm=1)
Ապրիլի 29-ին տեղի կունենա ոստիկանության վետերանների խորհրդի 7-րդ համաժողովը: Մեր զրույցը ոստիկանության վետերանների խորհրդի նախագահ, ոստիկանության պետի խորհրդական Գրիգոր Աբովյանի հետ վետերանների կատարած աշխատանքի, խնդիրների ու ծրագրերի շուրջ է:
- Պարո՛ն Աբովյան, ի՞նչ ձեռքբերումներով, հիմնախնդիրներով ու ծրագրերով եք ներկայանալու համագումարին:
- Անցած ժամանակահատվածում ձեռքբերումներներն ավելի շատ էին: Նախ՝ ոստիկանության պետի հրամանով տարածքային բաժիններում խորհրդատվական խմբերի ստեղծումը, որոնցում ընդգրկվեցին առավել գործունյա ու փորձառու վետերանները, ակնհայտորեն տվեց իր դրական արդյունքը՝ ոստիկանության հետ համագործակցությունն առավել ակտիվացնելու առումով: Հանցավորության եւ իրավախախտումների դեմ պայքարի ու կանխարգելման գործում, ինչպես եւ երիտասարդ կադրերի հետ տարվող աշխատանքներում ոստիկանության հետ համագործակցությունը առավել գործնական ու ակտիվ դարձավ: Արդյունքն առավել քան ակնհայտ է: Վետերաններն ակտիվորեն աջակցում են ոչ միայն իրենց փորձով ու գիտելիքներով հիմնավորված խորհուրդներով, այլեւ նախաձեռնություն ու անձնական մասնակցություն են ցուցաբերում, օրինակ, հանցագործությունների բացահայտման ու կանխարգելման գործում:
Ասելիքս ավելի առարկայական դարձնելու համար մի քանի թիվ նշեմ:
2012-2013 թվականների ընթացքում վետերանների աջակցությամբ հանցագործության 478 դեպք է բացահայտվել: Այդ թվում՝ ավազակային հարձակման՝ հինգ, անձնական ունեցվածքի գողության՝ 286, մարմնական վնասվածքի՝ 47, թմրամիջոցների ապօրինի շրջանառության՝ 30, ապօրինի զենք-զինամթերքի՝ 24, սպանության եւ սպանության փորձի՝ 3, կողոպուտի՝ 4, բնակարանային գողության՝ 4, այլ հանցագործությունների՝ 74:
Վետերանների աջակցությամբ հայտնաբերվել է հետախուզման մեջ գտնվող 60 անձ: Սա, կարծում եմ, փոքր ցուցանիշ չէ:
- Հանցավորության դեմ պայքարի գործում մեծ դեր ունեն պրոֆիլակտիկ միջոցառումները, եւ ոստիկանության քաղաքականության առանցքային ուղղություններից մեկն էլ ինչպես պարբերաբար անցկացվող համալիր, այնպես էլ ամենօրյա կանխարգելիչ-բացատրական աշխատանքներն են: Վետերաններն այդ առումով ի՞նչ ձեռքբերումներ ունեն:
- Վետերաններն ակտիվորեն ներգրավված են ոստիկանության տարածքային բաժիններում անցկացվող «Կանեփ-կակաչ» օպերատիվ կանխարգելիչ միջոցառումներին: Բնակչության շրջանում մեր կողմից իրականացվող բացատրական աշխատանքների շնորհիվ գրանցվել է զենք-զինամթերքի կամավոր հանձնման 57 դեպք, որից 33-ը՝ Երեւանում:
Վետերաններն ակտիվ մասնակցում են նաեւ անհատական պրոֆիլակտիկ աշխատանքներին. դրանցում ընդգրկված են 1160 վետերան, ընդ որում՝ 615-ը պրոֆիլակտիկ աշխատանք է իրականացնում անչափահասների շրջանում: Օրինակ, դպրոցներում անցկացրել ենք շախմատի եւ հրաձգության մրցումներ՝ դժվար դաստիարակվող անչափահասների մասնակցությամբ, իսկ վերջերս սպորտլանդիա անցկացրինք, որին մասնակցեցին մայրաքաղաքի հինգ դպրոցների աշակերտներ:
Դպրոցականների համար կազմակերպել ենք նաեւ պատմամշակութային միջոցառումներ՝ այցելություն Սարդարապատ, Եռաբլուր, Նորավանք, Տաթեւի վանք, Էջմիածին եւ այլ վայրեր: Նման միջոցառումներ կազմակերպելու գործում հատկապես ակտիվ են Երեւանի, Կենտրոնի, Քանաքեռ-Զեյթունի, Մալաթիայի, Լոռու, Տավուշի եւ Արմավիրի վետերանական կազմակերպությունները:
- Գաղտնիք չէ, որ վետերանների մի ստվար զանգված սոցիալապես խոցելի է: Նրանց աջակցելու համար ոստիկանության վետերանների խորհուրդը իրականացնո՞ւմ է ծրագրեր:
- Վերջին երկու տարում վետերաններից եւ զոհվածների ընտանիքների անդամներից 1293 դիմում ենք ստացել, ուսումնասիրել: Չնայած որոշ օգնություն ցուցաբերել ենք, բայցեւայնպես շատ անելիք ունենք հատկապես զոհված ոստիկանների ընտանիքներին օգնելու առումով:
Անելիքները շատ են, շատ են ծրագրերը, նաեւ մեծ է աշխատելու պատրաստակամությունը, շարքում մնալու վճռականությունը: