ՀՀ ոստիկանության պետն ընդունել է Եվրոպայի խորհրդի խորհրդարանական վեհաժողովի ժամանակավոր հանձնաժողովի նախընտրական դիտորդական առաքելության պատվիրակությանը

Հունվարի 17-ին ՀՀ ոստիկանության պետ, գեներալ-լեյտենանտ Վլադիմիր Գասպարյանն ընդունեց Եվրոպայի խորհրդի խորհրդարանական վեհաժողովի ժամանակավոր հանձնաժողովի նախընտրական դիտորդական առաքելության պատվիրակությանը՝ Կարին Վոլդսեթի գլխավորությամբ:

Ողջունելով հյուրերին՝ ոստիկանության պետը ներկայացրեց իրականացվող միջոցառումները, որոնք ուղղված են ընտրացուցակների ճշգրտմանը, նախընտրական շրջանում հավաքների անցկացման ապահովմանը, նախագահի թեկնածուների անվտանգության պահպանմանը և մի շարք այլ խնդիրների, որոնց լուծումը առաջիկա ընտրությունները բարձր մակարդակով անցկացնելու գրավականներից է:

Վլադիմիր Գասպարյանը նշեց, որ այդ ուղղությամբ իրականացվող ծավալուն նախապատրաստական աշխատանքը, ինչպես և նախորդ ընտրությունների ընթացքում ձեռք բերած հարուստ փորձը, հիմք են տալիս հավաստելու, որ նախագահական ընտրությունների ընթացքում, ինչպես և նախընտրական փուլում ոստիկանությունը լիարժեք կկատարի օրենքով վերապահված գործառույթները:

Շնորհակալություն հայտնելով ջերմ ընդունելության համար՝ Կարին Վոլդսեթը դրական գնահատեց կարճ ժամանակահատվածում կատարված աշխատանքը և հույս հայտնեց, որ ոստիկանությունն իր ծանրակշիռ դերակատարումը կունենա ընտրությունների շրջանում:

Հանդիպման ընթացքում հյուրերին հետաքրքրող բոլոր հարցերին տրվեցին սպառիչ պատասխաններ: