Ճանապարհային ոստիկանությունը հյուրընկալել էր դպրոցականներին

Ճանապարհային ոստիկանությունն անվտանգ երթևեկության մշակույթի բարձրացման նպատակով հաճախ է կազմակերպում տարաբնույթ միջոցառումներ, այդ թվում՝ նախադպրոցականների և դպրոցականների մասնակցությամբ։ Հուլիսի 14-ին ճանապարհային ոստիկանությունը հյուրընկալել էր «Գլոբալ բրիջ» կրթահամալիրի ամառային դպրոցի սաներին։ Նրանց ընդունեցին ճանապարհային ոստիկանության պետ Եգոր Կարապետյանը և տեղակալ Նորիկ Սարգսյանը։ Ճանապարհային ոստիկանության ղեկավարները զրույցի, հարց ու պատասխանի միջոցով ստուգեցին ճանապարհային երթևեկության ոլորտի մասին երեխաների գիտելիքները, ապա նաև հետաքրքրաշարժ օրինակների միջոցով բացատրեցին երթևեկության մասնակիցների դերի, ճանապարհային նշանների և երթևեկության հիմնական կանոնների կարևորության մասին։ Երեխաներն առանձնակի հետաքրքրություն ցուցաբերեցին ողջ հանդիպման ընթացքում, իսկ ավարտին ստացան նաև լուսանդրադարձիչ թևնոցներ, որոնք կօգնեն օրվա մութ ժամերին վարորդների համար լինել տեսանելի:
Կրթահամալիրի սաները ծանոթացան նաև ճանապարհային ոստիկանության օպերատիվ կառավարման և իրավախախտումների արձանագրման կենտրոնների աշխատանքներին։
Այցի ավարտին դպրոցականները ուսումնասիրեցին ճանապարհապարեկային ծառայություն իրականացնող հատուկ կահավորված մեքենան և դրա հնարավորությունները։