Մանրամասներ Կարբի գյուղի վիճաբանությունից. կա ձերբակալված

Ինչպես տեղեկացրել էինք՝ մայիսի 27-ին, ժամը 22-ն անց 50-ին «Աշտարակ» բժշկական կենտրոնից ոստիկանություն հաղորդում էր ստացվել, որ մարմնական վնասվածքներով իրենց մոտ են տեղափոխվել Կարբի գյուղի բնակիչներ, 1959 թվականին ծնված Վ․ Խ․-ն և 1976 թվականին ծնված Ա․ Հ․-ն։
Պարզվել էր, որ նույն ժամանակահատվածում Կարբի գյուղի բնակիչներ 1985 թվականին ծնված Ա․ Բ․-ն և 1984 թվականին ծնված Հ․ Գ․-ն՝ հրազենային վնասվածքով, տեղափոխվել են «Աստղիկ» բժշկական կենտրոն, նույն գյուղի բնակիչ, 1989 թվականին ծնված Ա․ Պ․-ն էլ դանակահարված վիճակում տեղափոխվել է «Արմենիա» բժշկական կենտրոն։
Ոստիկանների ձեռնարկած անհետաձգելի միջոցառումների շնորհիվ ճշտվել էր, որ քաղաքացիները վնասվածքները ստացել են Կարբի գյուղում տեղի ունեցած ծեծկռտուքի ժամանակ։
Դեպքի վայր էին մեկնել ոստիկանության օպերատիվ խումբը՝ ՀՀ ոստիկանության պետի առաջին տեղակալ Արման Սարգսյանի գլխավորությամբ։
Ոստիկանների ձեռնարկած ծավալուն օպերատիվ հետախուզական միջոցառումների շնորհիվ ճշտվել էր ծեծկռտուքի մասնակիցների ինքնությունը։
Փաստի առթիվ հարուցվել էր քրեական գործ։
Նշանակվել էր դատաբժշկական փորձաքննություն։
Ոստիկանության քրեական հետախուզության գլխավոր վարչության, Ազգային անվտանգության ծառայության, Արագածոտնի մարզային վարչության և Աշտարակի բաժնի ծառայողների միջոցառումների շնորհիվ պարզվել է, որ մայիսի 27-ին, ժամը 22.30-ի սահմաններում, 1974 թ. ծնված Ա. Դ.-ն Կարբի գյուղի հրապարակում ինքնաձիգից կրակոցներ է արձակել Հ․ Գ․-ի և Ա․ Բ․-ի ուղղությամբ, որոնք հրազենային վնասվածքներով բուժօգնության են տեղափոխվել հիվանդանոց:
Ձեռնարկված օպերատիվ միջոցառումների և բացատրական աշխատանքների շնորհիվ, մայիսի 28-ին, ժամը 20.00-ին, Ա. Դ.-ն ներկայացել է բաժին, տվել բացատրություն և ներկայացրել հրազենը:
Ա. Դ.-ն ձերբակալված է:
Նշանակվել է դատաձգաբանական փորձաքննություն:
Նախաքննությունը շարունակվում է:

***
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: