Մարաշի ոստիկանները հայտնաբերեցին խարդախ տաքսիստին

Սեպտեմբերի 6-ին, ժամը 23.45-ին, Մարաշի բաժանմունք է ներկայացել մի օտարերկրացի: 26-ամյա երիտասարդը հայտնել է, որ նույն օրը, առավոտյան ժամը 5-ին, «Զվարթնոց» օդանավակայանից նստել է տաքսի և ուղևորվել հյուրանոց: Նա հավելել է, որ տեղ հասնելուն պես, նախապես պայմանավորված հինգ հազար դրամի փոխարեն ինքը վարորդին վճարել է 50 եվրո, սակայն տաքսու վարորդն իրեն չի վերադարձրել մանրը, ավելին՝ սպառնալիքներ է հնչեցրել իր հասցեին և դուրս հանել մեքենայից:
Բաժանմունքի քրեական հետախույզների ձեռնարկած միջոցառումների արդյունքում պարզվել է, որ նշված մեքենայի վարորդը Հաղթանակ թաղամասի բնակիչ է, 27 տարեկան երիտասարդ: Ահազանգից մեկ ժամ անց Իսակովի պողոտայում նա հայտնաբերվել է, խարդախություն և հոգեբանական ներգործություն կատարելու հիմնավոր կասկածանքով ձերբակալվել ու տեղափոխվել է բաժանմուք:
Նախապատրաստված փաստաթղթերը փոխանցվել են քննչական բաժին: