Մեթամֆետամին ու մարիխուանա. համացանցային թմրաշրջանառության դեմ Քրեական ոստիկանության պայքարի հերթական դրվագը

Քրեական ոստիկանության թմրամիջոցների անօրինական շրջանառության դեմ պայքարի վարչության կազմում գործող համացանցի միջոցով թմրամիջոցների ապօրինի շրջանառության դեմ պայքարի նորաստեղծ բաժնի ծառայողները հերթական դեպքն են բացահայտել։ Նրանք հոկտեմբերի լույս 26-ի գիշերը, ապօրինի թմրամիջոց պահելու, օգտագործելու և իրացելու կասկածանքով, Նոր Խարբերդում ձերբակալել և Շենգավիթի բաժին են տեղափոխել Նոր Նորքի բնակիչ, 25-ամյա մի երիտասարդի: Նրա խուզարկությամբ հայտնաբերվեց մեթամֆետամին տեսակի թմրանյութով 65 փաթեթ` ընդհանուր 42 գրամից ավելի քաշով, ևս երեք փայլաթիթեղե փաթեթ մարիխուանա, նաև` գաղտնի փականով դանակ:
Հետագա օպերատիվ-հետախուզական միջոցառումների և քննչական գործողությունների արդյունքում հայտնի դարձավ, որ երիտասարդը տնօրինում և օգտագործում է «տելեգրամյան» մի քանի ալիք, որոնց միջոցով իրացնում է թմրամիջոցներ:
Շենգավիթի քննչական բաժնում նախաձեռնվել է քրեական վարույթ, որի շրջանակներում իրավապահները խուզարկել են մայրաքաղաքի Ռուբինյանց փողոցում երիտասարդի վարձակալած բնակարանը՝ հայտնաբերելով փայլաթիթեղներով փաթեթավորված մոտ 187 գրամ մարիխուանա:
25-ամյա երիտասարդը կալանավորվել է։ Նախաքննությամբ հանգամանքները պարզվում են: