Շնորհավոր նոր ուսումնական տարի (ՏԵՍԱՆՅՈՒԹ)
![Շնորհավոր նոր ուսումնական տարի (ՏԵՍԱՆՅՈՒԹ) Շնորհավոր նոր ուսումնական տարի (ՏԵՍԱՆՅՈՒԹ)](/timthumb?src=/resources/police/img/news/big/1472644551,1352.jpeg&q=75&w=780&wm=1)
Սեպտեմբերի 1-ին մեկնարկում է նոր ուսումնական տարին, և ոստիկանությունը, ավանդույթի համաձայն, օգոստոսի 29-ից հասարակական կարգի պահպանության և ճանապարհային երթևեկության անվտանգության ապահովման ուժեղացված ծառայության է անցել մայրաքաղաքի ու մարզերի դպրոցամերձ տարածքներում ու փողոցներում:
«Զգուշացեք, երեխաներ են» նշանաբանով ծառայության մեջ ներգրավված են ճանապարհային ոստիկանության, պարեկապահակետային ծառայության, անչափահասների գործերով և համայնքային ոստիկանության տեսուչներ:
Միամսյակին նախորդած շրջանում կազմակերպվել են ճանապարհային երթևեկության կանոնների ուսուցողական դասընթացներ, անչափահասների գործերով տեսուչների և ՃՈ ծառայողների մասնակցությամբ հանդիպումներ են անցկացվել դպրոցների տնօրենների, մանկավարժական խորհուրդների, տեղական ինքնակառավարման մարմինների ներկայացուցիչների հետ:
Դպրոցների հարակից փողոցներում թարմացվել է գծանշումը, կարգաբերվել են լուսացույցները, իսկ գետնանցումներ չունեցող, լուսացույցերով ու գծանշումներով չկարգավորվող փողոցներում երեխաները փողոցը հատում են խմբերով՝ ոստիկանության ծառայողի ուղեկցությամբ:
Գերխնդիրը մեկն է՝ ապահովել մեր երեխաների անվտանգությունը: Եվ ոստիկանությունն անում է ամեն ինչ՝ այդ խնդիրը լուծելու համար, միևնույն ժամանակ ակնկալելով համաքաղաքացիների աջակցությունը:
Մեծահասականերին խնդրում ենք ուշադիր լինել երեխաների հանդեպ և հարկ եղած դեպքում փողոցում օգնել նրանց:
Վարորդներին կոչ ենք անում պահպանել երթևեկության կանոններն ու բացառել արագության գերազանցումը դպրոցամերձ տարածքներում:
Դիմում ենք ծնողներին, մանկավարժներին, ավագ դպրոցների աշակերտներին, ուսանողներին՝ համատեղ ապահովենք երեխաների անվտանգությունը և՛ միամսյակի, և՛ ողջ տարվա ընթացքում:
Շնորհավորում ենք բոլորին նոր ուսումնական տարվա մեկնարկի առթիվ և մաղթում հաջողություններ:
ՀՀ ոստիկանություն