Գեղարքունիքի մարզի պարեկների պայքարը թմրամոլության դեմ

Վերջին օրերին ծառայություն իրականացնելիս Գեղարքունիքի մարզի պարեկները հայտնաբերել են թմրանյութեր: Իրավախախտումն արձանագրելու համար Բերդկունք գյուղի մոտ նրանք կանգնեցրել են «Օպել» մակնիշի մի մեքենա: Արարատի մարզի բնակիչ 43-ամյա տղամարդու կասկածելի վարքը ստիպում է իրավապահներին նրան տեղափոխել ոստիկանության Վարդենիսի բաժին: Այստեղ նրա մոտ խուզարկությամբ հայտնաբերվում են դեղնականաչավուն զանգվածով կաթուցիչ և կանեփի սերմի նմանվող հատիկներ:
Ըստ 43-ամյա տղամարդու` կաթուցիչում մարիխուանա է, դա և կանեփի հատիկները գտել է մեկ ամիս առաջ և պահել անձնական օգտագործման համար:
Նման մի դեպք էլ պատահեց Վարդենիս քաղաքի Երիտասարդության փողոցում, երբ Գեղարքունիքի պարեկները կանգնեցրին իրավախախտ վարորդին: Ստուգման ընթացքում վարդենիսցի 25-ամյա վարորդը գրպանից նետեց կաթուցիչ: Պարեկները թմրանյութ պահելու և օգտագործելու կասկածանքով նրան ձերբակալեցին ու տեղափոխեցին ոստիկանության Վարդենիսի բաժին: Մեքենան տեղափոխվեց բաժնի պահպանվող հատուկ տարածք:
25-ամյա երիտասարդը հայտնել է, թե կանեփը հավաքել է վայրաճ թփերից և իր օգտագործման համար պատրաստել թմրանյութ:
Մայիսի 23-ին, գիշերվա ժամը 4.20-ի սահմաններում, Երևան-Սևան-Իջևան ճանապարհի 62-րդ կմ-ին պարեկները կանգնեցրել են «ՎԱԶ-2121» մակնիշի մի մեքենա: Ստուգմամբ պարզվել է, որ Եղվարդի բնակիչ 25-ամյա վարորդը չունի վարորդական իրավունքի վկայական: Վարորդին, նրա հասակակից ուղևորին, մեքենայով հանդերձ, տեղափոխել են Սևանի բաժին: Այդ ընթացքում Աբովյան քաղաքի բնակիչ 25-ամյա ուղևորը հայտնել է, որ մոտը թմրանյութ կա: Ոստիկանության Սևանի բաժնում ուղևորի մոտ խուզարկությամբ հայտնաբերվել են մոխրացած հետքերով կաթուցիչ ու դեղնականաչավուն զանգված: Մեքենան տեղափոխվել է բաժնի պահպանվող հատուկ տարածք:
Երեք դեպքով էլ կազմված փաստաթղթերն ուղարկվել են նախաքննական մարմին, հանգամանքները պարզվում են: