Հուլիսի 8-ին ԶԼՄ-ների ներկայացուցիչներն այցելեցին պարեկային ծառայության Երևանի գունդ

Հուլիսի 8-ին զանգվածային լրատվության միջոցների ներկայացուցիչներն այցելեցին պարեկային ծառայության Երևանի գունդ՝ ծանոթանալու նոր ծառայության առանձնահատկություններին։ Պարեկները լրագրողներին ներկայացրին ծառայողական մեքենաների տեխնիկական հագեցվածությունը, հնարավորությունները, անդրադարձան իրենց ամրակցված տեխնիկական միջոցներին, ընդգծեցին դրանց կարևորությունը՝ նոր որակի ծառայություն մատուցելու գործում։ Ոստիկանության պետի տեղակալ Արա Ֆիդանյանը, պատասխանելով զանգվածային լրատվության միջոցների ներկայացուցիչների հարցերին, ներկայացրեց պարեկային ծառայության գործառույթները՝ ընդգծելով, որ պարեկները մայրաքաղաքում պետք է ապահովեն հասարակական կարգը, ճանապարհային երթևեկության անվտանգությունը, ինչպես և արագ արձագանքեն օպերատիվ կառավարման նորաստեղծ կենտրոնից փոխանցվող ահազանգերին։ Ավարտին պարեկները շտապեցին իրենց վստահված երթուղիներ՝ ծառայության։