Պարեկների կողմից Նոր Նորքի բաժին բերման ենթարկված տղամարդու մեքենայում մարիխուանա կար

Փետրվարի 15-ին պարեկային ծառայության Երևանի գնդի 3-րդ գումարտակի 1-ին վաշտի ոստիկանները Թևոսյան փողոցից, թմրամիջոց պահելու և օգտագործելու կասկածանքով, ոստիկանության Նոր Նորքի բաժին բերման են ենթարկել 29 ու 30 տարեկան երկու տղամարդկանց՝ «Օպել» մակնիշի մեքենայով հանդերձ։
30-ամյա տղամարդը մեքենայի սրահից ոստիկաններին է ներկայացրել մարիխուանայի նմանվող 4 գրամից ավելի դեղնականաչավուն զանգված և կաթուցիչ:
Նշանակվել է փորձաքննություն:
Ոստիկանության Նոր Նորքի բաժնում նախապատրաստվում են նյութեր: