ՊԱՐԶԱԲԱՆՈՒՄ

Զանգվածային լրատվության միջոցներով տարածվել է ՀՀ Նախագահի թեկնածու Րաֆֆի Հովհաննիսյանի նախընտրական շտաբի հայտարարությունը, համաձայն որի Երևան, Չարենցի փ. 19/7  հասցեում նախկինում բնակվող Բադալյանների ընտանիքից Անդրիաս Բադալյանը մահացած է, իսկ մնացածը ապրում են արտասահմանում, տարիներ առաջ հրաժարվել են քաղաքացիությունից և դուրս են եկել գրանցումից: Սակայն մինչ օրս նրանց անունները առկա են ընտրողների ցուցակներում: 

Ստուգմամբ պարզվել է, որ տեղեկությունը վերաբերում է ոչ թե Երևան, այլ Վաղարշապատ քաղաքի Չարենցի փ., 19/7  հասցեում հաշվառված անձանց:

Ոստիկանության ծառայողների կողմից վերը նշված հասցում կատարված ուսումնասիրությամբ պարզվել է, որ Անդրիաս Սարգսի Բադալյանը (01.08.1951 թ.) շուրջ երկու տարի առաջ մահացել է ՀՀ սահմաններից դուրս: Ա. Բադալյանի մահվան փաստի վերաբերյալ ՀՀ օրենսդրությամբ սահմանված կարգով բնակչության պետական ռեգիստրը վարող մարմինը չի տեղեկացվել: 

Ընդ որում՝ հարկ է նշել, որ մահվան փաստի վերաբերյալ ռեգիստրը վարող մարմնին օրենսդրությամբ սահմանված կարգով չտրամադրված տեղեկատվության առկայությունը ընտրողների ցուցակում, ՀՀ ընտրական օգրենսգրքի իմաստով անճշտություն չի համարվում: 

Ինչ վերաբերում է Ա.Բադալյանի հասցեում հաշվառված անձանց ՀՀ քաղաքացիությունից հրաժարվելու և ընտրողների ցուցակում վերջիններիս տվյալների առկայության վերաբերյալ տեղեկությանը, հայտնում ենք, որ «Հայաստանի Հանրապետության քաղաքացիության մասին» ՀՀ օրենքի 1-ին հոդվածի համաձայն՝ ՀՀ քաղաքացիությունից հրաժարվելը ինքնին չի հանգեցնում ՀՀ քաղաքացիությունը կորցնելուն: Նույն օրենքի 26-րդ հոդվածի համաձայն՝ Հայաստանի Հանրապետության քաղաքացիությունը դադարեցվում է ՀՀ Նախագահի հրամանագրով:

Վերը նշված հասցեում հաշվառված անձինք  Հայաստանի Հանրապետության քաղաքացիներ են և հաշվառված են բնակչության պետական ռեգիստրում, հետևաբար իրավաչափորեն ընդգրկված են ՀՀ ընտրողների ռեգիստրում: