Պարզաբանում

«Հրապարակ» օրաթերթի 27.07.2018թ. «Օսիպյանը թուղթուգիր է՞լ է քանդում» հրապարակման կապակցությամբ հայտնում ենք, որ ՀՀ ոստիկանությունում քաղաքացիների ընդունելության կազմակերպման կարգը սահմանված է ՀՀ ոստիկանության պետի 06.11.2017թ. թիվ 3050-Ա հրամանով:
Ըստ Հրամանով հաստատված կարգի՝ քաղաքացիները ոստիկանության պետի մոտ ընդունելության ներկայանում են ՀՀ ոստիկանության պետի աշխատակազմի ընդունարան: Քաղաքացիները գրանցվում են քաղաքացիների ընդունելության հաշվառման մատյանում՝ անձը հաստատող փաստաթղթի հիման վրա: Քաղաքացիների ընդունելության հաշվառման մատյանը վարում է Ընդունարանի ծառայողը, ով քաղաքացուն գրանցում է ընդունելությունների հաշվառման մատյանում՝ հայտնելով ընդունելության օրը, ժամը:
ՀՀ ոստիկանության պետ Վալերիյ Օսիպյանի կողմից քաղաքացիների ընդունելությունն իրականացվում է յուրաքանչյուր ամսվա վերջին շաբաթվա երրորդ օրը, ժամը 16:00-ից մինչև 18:00-ն:
Հրապարակման մեջ հիշատակված Սուսաննա Համբարձումյանին 2 անգամ՝ 13.03.2012թ. և 28.03.2012թ. ընդունել է տվյալ պահին ՀՀ ոստիկանության պետի օգնական, ներկայիս ՀՀ ոստիկանության պետի աշխատակազմի ղեկավար Մ.Հակոբյանը, ում կողմից խնդրի ուսումնասիրության արդյունքում պարզաբանվել է ՀՀ օրենսդրության համապատասխան ոլորտը կանոնակարգող իրավական ակտերի դրույթների պահանջները: Միաժամանակ՝ ընդունելության արդյունքներով ՀՀ ոստիկանության պետին զեկուցվել է քաղաքացու կողմից բարձրացված հարցը՝ օպերատիվ-հետախուզական աշխատանքների ոլորտում համապատասխան հանձնարարականներ տալու առաջարկով:
Վերջին շրջանում Սուսաննա Համբարձումյանը սահմանված կարգով հերթագրվել և հրավիրվել է ՀՀ ոստիկանության պետ Վ.Օսիպյանի ընդունելությանը, սակայն, ելնելով ընդունելություն հայցող քաղաքացիների մեծաքանակ լինելուց և ՀՀ ոստիկանության պետի աշխատանքային գրաֆիկի ծանրաբեռնվածությունից, վերջինիս, ինչպես նաև մի խումբ այլ քաղաքացիների ընդունելությունը տեղափոխվել է ՀՀ ոստիկանության պետի կողմից ընդունելության հաջորդ ամսվա սահմանված օրը:
Հրապարակման մեջ տեղ գտած այլ՝ ոչ լիարժեք ընկալելի խնդիրների շուրջ քննարկման նպատակով քաղաքացի Սուսաննա Համբարձումյանը Հրամանով սահմանված կարգով հերթագրվել և հրավիրվել է ՀՀ ոստիկանության պետի հաջորդ ընդունելությանը:
Ինչ վերաբերում է ոստիկանության պետի կողմից ընդունելությունն ընդհատելու` Ս. Համբարձումյանի «բացատրությանը», ապա այն լիովին հորինվածք է:
Իրականում ոստիկանության պետը ոչ թե «կանչով բացակայել է», այլ այդ ընթացքում Կառավարությունում մասնակցել է խորհրդակցությանան նիստին, որի ընթացքում քննարկվել են Ֆրանկոֆոնիայի համաժողովի կազմակերպչական խնդիրներ, իսկ վերադառնալուց հետո ևս երկու ժամ շարունակել է քաղաքացիների ընդունելությունը:
Լրատվամիջոցներին կրկին կոչ ենք անում լիարժեք տեղեկատվություն հրապարակելու համար դիմել ոստիկանության համապատասխան ծառայություն. ոստիկանությունը միշտ պատրաստ է համագործակցության: