Վետերանների մասնակցությամբ շախմատի առաջնություն՝ խորհրդային միլիցիայի օրվա առթիվ

Նոյեմբերի 8-ին անցկացվեց Կենտրոն վարչական շրջանի ոստիկանության վետերանների խորհրդի և Հայաստանի «Դինամո» մարզական հասարակական կազմակերպության կազմակերպած շախմատի բաց առաջնություն։
Առաջնությունը նվիրված էր խորհրդային միլիցիայի օրվան։ Մասնակցում էին ոստիկանության Երևան քաղաքի և Կոտայքի մարզային վարչությունների ենթակա բաժինների վետերանների հավաքական թիմերը։ Մրցավարական աշխատանքները կազմակերպել էր Երևանի շախմատի ֆեդերացիան։
Հետաքրքիր և անզիջում պայքարից հետո պարզ դարձան հաղթողները։ Պատվավոր առաջին տեղը զբաղեցրեց Կենտրոն վարչական շրջանի հավաքական թիմը, 2-րդը՝ Մալաթիայի, 3-րդը՝ Էրեբունու վարչական շրջանի հավաքական թիմերը։
Մրցանակային տեղեր զբաղեցրած թիմերին պարգևատրեցին «Դինամո» մարզական հասարակական կազմակերպության նախագահի առաջին տեղակալ Արմեն Մկրտչյանն ու Կենտրոն վարչական շրջանի ոստիկանության վետերանների խորհրդի նախագահ Գագիկ Վարդանյանը։