ՀՀ ոստիկանության պատվիրակության այցերը Վրաստանի ՆԳՆ տարբեր ծառայություններ (ՏԵՍԱՆՅՈՒԹ, ԼՈՒՍԱՆԿԱՐՆԵՐ)
![ՀՀ ոստիկանության պատվիրակության այցերը Վրաստանի ՆԳՆ տարբեր ծառայություններ (ՏԵՍԱՆՅՈՒԹ, ԼՈՒՍԱՆԿԱՐՆԵՐ) ՀՀ ոստիկանության պատվիրակության այցերը Վրաստանի ՆԳՆ տարբեր ծառայություններ (ՏԵՍԱՆՅՈՒԹ, ԼՈՒՍԱՆԿԱՐՆԵՐ)](/timthumb?src=/resources/police/img/news/big/1545139510,76.jpeg&q=75&w=780&wm=1)
Պաշտոնական այցի շրջանակում հայկական պատվիրակությունը՝ ՀՀ ոստիկանության պետ Վալերիյ Օսիպյանի գլխավորությամբ եղավ Վրաստանի ներքին գործերի նախարարության օպերատիվ կառավարման միասնական կենտրոնում:
Ստորաբաժանման ղեկավարությունը ներկայացրեց ծառայության բնույթն ու գործառույթները, ինչից հետո հյուրերը շրջեցին կենտրոնում:
Վրաստանի ներքին գործերի նախարարության օպերատիվ կառավարման միասնական կենտրոնը գործում է 2016 թվականից: Հենց այստեղից են ղեկավարվում և համակարգվում հանրապետության փողոցներում տեղադրված տեսախցիկները:
Ի դեպ, տեսախցիկները ոչ միայն արձանագրում են խախտում կատարած մեքենաների համարանիշերը, այլև հնարավորություն ունեն նույնականացնելու խցիկի տեսադաշտում հայտնված քաղաքացուն՝ ցույց տալով նրա անհատական տվյալները:
Ծրագրվում է շուրջ մեկ տարի հետո տեսախցիկները թիվը հասցնել 4000-ի, ինչը թույլ կտա ավելի արդյունավետ դարձնել երթևեկության վերահսկումը, հասարակական կարգի պահպանությունն ու պայքարը հանցավորության դեմ:
Նույն օրը ՀՀ ոստիկանության պատվիրակությունը այցելեց նաև Վրաստանի ներքին գործերի նախարարության ծառայության գործակալության Ռուսթավիի կոնտրոն: Գործակալության ղեկավարությունը ներկայացրեց ստորաբաժանման գործառույթները:
Պատվիրակության անդամները ծանոթացան ծառայության գործակալության տեխնիկական հագեցվածությանը, տրանսպորտային միջոցների հաշվառման, համարանիշերի տրամադրման աշխատանքին:
Ծառայության գործակալության այսպիսի կենտրոններում են տրվում նաև վարորդական վկայականները: Հայկական պատվիրակությանը ներկայացվեց նաև դրանց տրամադրման փուլերն ու գործընթացը:
Վրաստանի Հանրապետությունում գործում է նման 11 կենտրոն, ինչը դյուրացնում է հանրությանը ծառայություններ մատուցելու գործընթացը, արդյունավետ դարձնում իրավապահների աշխատանքը, բացառում անհարկի հապաղումներն ու քաղաքացու ժամանակի կորուստը: