Վաղարշապատի ոստիկանները բացահայտեցին տրակտորի գողությունը. գողոնը հայտնաբերվել է

Ապրիլի 18-ի երեկոյան ոստիկանության Վաղարշապատի բաժնում հաղորդում տվեց Էջմիածնի մի բնակիչ: Ըստ նրա` ժամեր առաջ ոմն մեկը հափշտակել էր իր տրակտորը: Բաժնի քրեական հետախույզներն անմիջապես անցան գործի և նույն օրն էլ պարզեցին ոմն մեկի ինքնությունը: Օպերատիվ տեղեկությունների համաձայն` հաշվառման հասցե չունեցող 27-ամյա երիտասարդը հանցավոր համաձայնության էր եկել Կոտայքի մարզի Քանաքեռավան գյուղի բնակիչ՝ 46 և 29 տարեկան երկու տղամարդկանց հետ, և երեքով իրականացրել էին տրակտորի գողությունը:
Նախաձեռնվեց քրեական վարույթ, որի շրջանակներում ձեռնարկված հետագա միջոցառումներով տեղեկությունները ճշտվեցին, նաև պարզվեց տրակտորի տեղը: Ապրիլի 25-ին ձերբակալվեց և ոստիկանության Վաղարշապատի բաժին տեղափոխվեց 46-ամյա քանաքեռավանցին: Բացատրական աշխատանքի արդյունքում նա խոստովանեց արարքը: Նույն օրը ձերբակալվեց նաև նրա 29-ամյա համագյուղացին:
Քանաքեռավան գյուղում թաքցրած տրակտորը հայտնաբերվեց:
Ձեռնարկվում են միջոցառումներ՝ հաշվառման հասցե չունեցող 27-ամյա երիտասարդին հայտնաբերելու և դեպքի հանգամանքներն ամբողջացնելու ուղղությամբ: