Համագործակցության ևս մեկ ամուր հարթակ ՀՀ ոստիկանության կրթահամալիրի և ՌԴ ՆԳՆ Մոսկվայի և Սանկտ Պետերբուրգի համալսարանների միջև

2016 թվականի նոյեմբերի 30-ից դեկտեմբերի 3-ը ՀՀ ոստիկանության կրթահամալիրի պատվիրակությունը ՌԴ ՆԳՆ Կիկոտի անվան Մոսկվայի համալսարանի հրավերով այցելեց քաղաք Մոսկվա:
Պատվիրակությունը գլխավորում էր կրթահամալիրի պետ, ոստիկանության գեներալ-լեյտենանտ Հովհաննես Վարյանը:
Պատվիրակության կազմում էին կրթահամալիրի պետի տեղակալ կադրերի և անձնակազմի գծով, ոստիկանության գնդապետ Գարեգին Մալխասյանն ու կրթահամալիրի քոլեջի հասարակագիտական առարկաների և հոգեբանական ամբիոնի դոցենտ, ոստիկանության փոխգնդապետ Արթուր Սարգսյանը:
ՀՀ ոստիկանության կրթահամալիրի պատվիրակությունը նոյեմբերի 30-ին մասնակցեց ՌԴ ՆԳՆ Կիկոտի անվան Մոսկվայի համալսարանի կողմից կազմակերպված «Երիտասարդների իրավական դաստիրակություն` ընտանիք և հասարակություն» թեմայով միջազգային համաժողովին, որտեղ ելույթով հանդես եկավ դոցենտ Ա. Սարգսյանը:
Հաջորդ օրը տեղի ունեցավ ՌԴ ՆԳՆ Մոսկվայի համալսարանի պետ, ոստիկանության գեներալ-լեյտենանտ Ի. Ա. Կալինիչենկոյի և ՀՀ ոստիկանության կրթահամալիրի պետ, ոստիկանության գեներալ-լեյտենանտ Հ. Կ. Վարյանի հանդիպումը, որին հաջորդեց կրթական հաստատությունների միջև համագործակցության արձանագրության ստորագրումը:
Այնուհետև հյուրընկալող կողմը մանրամասն ներկայացրեց իրենց բուհի կառուցվածքը, նյութատեխնիկական բազան, կրթական ծրագրերը և զարգացման հեռանկարային ուղղությունները:

Դեկտեմբերի 5-ից 8-ը կրթահամալիրի պատվիրակությունը հյուրընկալվեց ՌԴ ՆԳՆ Սանկտ Պետերբուրգի համալսարանում, որտեղ արժանացավ ջերմ ընդունելության:
Համալսարանի պետ, ոստիկանության գեներալ-լեյտենանտ Վ. Ա. Կուդինի ուղեկցությամբ շրջայց կատարվեց տարածքով, որի ընթացքում ներկայացվեց բուհի գործունեությունը ստեղծման օրվանից մինչ օրս:
Այնուհետև հանդիսավոր պայմաններում կայացավ համագործակցության արձանագրության ստորագրման արարողությունը, որի ավարտին կողմերը ընդգծեցին արձանագրության անհրաժեշտությունը` հետագա փոխշահավետ գործունեություն ծավալելու նպատակով: