Անվտանգ համացանցի մտահոգությամբ (ՏԵՍԱՆՅՈՒԹ)

20.12.2014 11:00 ԵԱՀԿ-ՀՀ ոստիկանություն

Դեկտեմբերի 16-ին «Կոնգրես» հյուրանոցում կայացավ ՀՀ ոստիկանության ԿՀԴՊ գլխավոր վարչության նախաձեռնությամբ և ԵԱՀԿ երևանյան գրասենյակի աջակցությամբ կազմակերպված կլոր սեղան-քննարկում: Միջոցառմանը մասնակցում էին Հայաստանում Ինտերնետ ծառայության ոլորտի հիմնական դերակատարները և ոստիկանության շահագրգիռ ստորաբաժանումների ներկայացուցիչներ:

Միջոցառումն այս ձևաչափով իրականացվում էր առաջին անգամ:

Բացման խոսքով հանդես եկան ԿՀԴՊ ԳՎ 3-րդ վարչության պետ Տիգրան Պետրոսյանը և ԵԱՀԿ երևանյան գրասենյակի ռազմաքաղաքական ծրագրերի ազգային պատասխանատու Դավիթ Հարությունյանը:

- Մենք ունենք միասնական մեկ նպատակ` հանրությանը մատուցել որակյալ ծառայություններ` ապահովելով օգտատերերի անվտանգությունը հանցավոր ոտնձգություններից, - իր խոսքում նշեց Տիգրան Պետրոսյանը: - Տարիների ընթացքում բավական արդյունավետ համագործակցություն է ծավալվել Ինտերնետ ծառայություն մատուցողների և իրավապահ մարմինների միջև, սակայն անկեղծ լինենք. այդ համագործակցության հիմքում անձնական փոխհարաբերություններն էին և բարի կամքը: Կլոր սեղանի նպատակն է` գտնել այնպիսի մեխանիզմներ և գործիքներ, որոնք թույլ կտան համագործակցությունն անձնական դաշտից տեղափոխել իրավական դաշտ:

Մյուս զեկուցողներն էլ նշեցին համագործակցության անհրաժեշտությունը, որը բխում է նաև Հայաստանի կողմից վավերացված` «Կիբերհանցագործությունների մասին» Եվրախորհրդի կոնվենցիայի պահանջներից:

Որոշում կայացվեց շարունակել համագործակցությունը` միասնական ջանքերով օրենսդրական կարգավորումներն ապահովելու ուղղությամբ:

Փակման խոսքում Դավիթ Հարությունյանը, շեշտելով քննարկման բարձր արդյունավետությունը, ԵԱՀԿ երևանյան գրասենյակի անունից պատրաստակամություն հայտնեց հետագայում նույնպես օժանդակել նմանատիպ հանդիպումների կազմակերպմանը և ոլորտում առկա խնդիրների կարգավորմանը:

Անվտանգ համացանցի մտահոգությամբ (ՏԵՍԱՆՅՈՒԹ)

ՀԻՄՆԱԿԱՆ