Ապատեղեկատվություն տարածելու դեպքերը բացառելու նպատակով ՀՀ ոստիկանությունը պարզաբանում է

www.a1plus.am համացանցային կայքում հրապարակված տեղեկատվության համաձայն Բաղրամյան 26 հասցեում, որտեղ տեղակայված է ՀՀ Նախագահի նստավայրը, գրանցված է 55 ընտրող /10/30 ընտրական տեղամասի 984-ից մինչև 1039 ընտրողներով/: 

Հանրության շրջանում ապատեղեկատվություն տարածելու դեպքերը բացառելու նպատակով ՀՀ ոստիկանությունը պարզաբանում է, որ Երևան քաղաքի Բաղրամյան փողոց 26 հասցեում տեղակայված է ՀՀ Նախագահի աշխատակազմի վարչական շենքը, որտեղ ըստ բնակչության պետական ռեգիստրի և ՀՀ ընտրողների ռեգիստրի տվյալների որևէ քաղաքացի հաշվառված չէ:

Տվյալ դեպքում խոսքը վերաբերում է ՀՀ Նախագահի աշխատակազմի վարչական շենքի հարևանությամբ տեղակայված Բաղրամյան 26 հասցեի եռահարկ բազմաբնակարան բնակելի շենքին, որը բաղկացած է 5 մուտքերից: Նշված շենքում քաղաքացիների հաշվառումներն իրականացվել է բնակարանների նշումով` մասնավորապես. Բաղրամյան 26 շենք, 3, 6, 7, 8, 9, 11, 12, 14, 15, 16, 17, 18, 20, 23, 25, 28, 29, 30 և 31: 

Հետևաբար` 10/30 ընտրական տեղամասում 984-ից մինչև 1039 հերթական համարների ընտրողները հանդիսանում են Բաղրամյան 26 հասցեի եռահարկ բազմաբնակարան բնակելի շենքի բնակիչները, որոնք իրավաչափորեն ընդգրկված են ընտրացուցակում:

Զանգվածային լրատվության միջոցներին կրկին հորդորում ենք զերծ մնալ անհարկի շտապողականությունից, կասկած հարուցող նյութերը առանց ճշգրտելու հրապարակելուց և դրանով իսկ հանրությանը թյուրիմացության մեջ գցելուց: Վերստին կոչ ենք անում համակողմանի ուսումնասիրել իրողությունները և հանրությանը ներկայացնել ոստիկանության հետ համագործակցության արդյունքում մինչև վերջ ստուգված ու հավաստի տեղեկատվություն: