ԱԱԾ-ից ստացված տեղեկությունն իրացրին Հրազդանի ոստիկանները. բացահայտվեց ապօրինի ծառահատում
Հոկտեմբերի 31-ին Ազգային անվտանգության ծառայությունից ոստիկանության Հրազդանի բաժնում տեղեկություն ստացվեց, որ երկու տղամարդ, որոնցից մեկը՝ Հանքավանի, մյուսը՝ Մեղրաձորի բնակիչ, ապօրինի հատել են ծառեր և պատրաստվում են հանքավանցու վարած բեռնատարով փայտանյութը տեղափոխել:
Հրազդանի ոստիկանները շտապեցին տեղեկությունն իրացնելու և երեկոյան ժամը 7-ի սահմաններում մոտ 10 խմ փայտանյութով բեռնված «Զիլը» հայտնաբերվեց Հանքավանում: Վարորդն ու ընկերը հայտնել են, որ սոճիները հատել են Հանքավանի հարակից անտառից` առանց թույլտվության: Պարզվել է, որ նրանք նախկինում ևս կատարել են ապօրինի ծառահատումներ և փայտանյութը տեղափոխել հանքավանցու տան բակ:
Երկուսն էլ ձերբակալվել են: Փայտանյութով բեռնված բեռնատարը տեղափոխվել է Հրազդանի բաժնի պահպանվող հատուկ տարածք:
Ձեռնարկված միջոցառումներով պարզվել է նաև, որ բեռնատարի վրա տեղադրված է այլ մեքենայի համարանիշ:
Կոտայքի մարզային քննչական վարչությունում նախաձեռնվել է քրեական վարույթ, նախաքննությամբ հանգամանքները պարզվում են:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
