Արագ արձագանքելը որոշիչ էր. գողությունը դարձավ փորձ

Մարտի 18-ի գիշերը, ժամը չորսին մոտ, ոստիկանության Կենտրոնական բաժնում ահազանգ ստացվեց, որ Պուշկինի փողոցի մի խաղասրահից գողություն են անում: Ահազանգը փոխանցվեց նաև տարածքում գիշերային ծառայություն իրականացնող պարեկներին:
Պարեկային ծառայության Երևանի գնդի 3-րդ գումարտակի ոստիկանները արագ հասան դեպքի վայր, քիչ անց դեպքի վայրում էր նաև Կենտրոնական բաժնի օպերատիվ խումբը: Նշված խաղատնից կասկածանքով ոստիկանության Կենտրոնական բաժին բերման ենթարկվեցին Արտաշատ քաղաքի երկու բնակիչ` 34 և 26 տարեկան:
Նրանք խոստովանել են, որ փորձել էին գողանալ խաղային սարք և հեռակառավարման վահանակ: 34-ամյա տղամարդու խուզարկությամբ հայտնաբերվել է դանակ:
Նշանակվել է դատատեխնիկական փորձաքննություն:
Հանգամանքները քննությամբ պարզվում են: