Բազումի բաժնի ոստիկանները գողություններ են բացահայտել ու հայտնաբերել գողոնը

Մարտի 17-ից 19-ը ոստիկանության Բազումի բաժնի ծառայողները անձնական ունեցվածքի գողության երեք դեպք բացահայտեցին:
Քրեական հետախույզները Վանաձորի Երևանյան խճուղուց, Իսահակյան և Սուխումիի փողոցներից բերման ենթարկեցին երեք տղամարդու, որոնցից մեկը՝ 60, մյուսը՝ 32, երրորդը՝ 59 տարեկան:
Պարզվել է՝ մարտի 12-ին 60-ամյա տղամարդը Վանաձորի Քարքարոտ թաղամասում կայանված մի ավտոմեքենայից գողացել էր լուսարձակ: 32-ամյա տղամարդը Զորավար Անդրանիկի փողոցի շենքերից մեկի շքամուտքից գործիքներ էր գողացել և գողոնը թաքցրել ավտոտնակում: Երրորդը մարտի 18-ին, օգտվելով ծանոթի բացակայությունից, նրա տնակից գողացել էր էլեկտրական պտուտակահան:
Բերման ենթարկված տղամարդիկ տվել են խոստովանական բացատրություն:
Երեք դեպքով էլ գողոնը հայտնաբերվել է:
Հանգամանքները պարզվում են: