Նախկինում կատարված գողության դեպքը բացահայտվեց
![Նախկինում կատարված գողության դեպքը բացահայտվեց Նախկինում կատարված գողության դեպքը բացահայտվեց](/timthumb?src=/resources/police/img/news/big/1662192096-553.jpeg&q=75&w=780&wm=1)
Հուլիսի 17-ին ոստիկանության օպերատիվ կառավարման կենտրոն էր զանգել հասարակական կազմակերպություններից մեկի նախագահը և հայտնել, որ Գեղարքունիքի մարզի Դարանակ գյուղի մի ճամբարից գողություն են արել:
Դեպքի վայր մեկնած ոստիկանության Վարդենիսի բաժնի օպերատիվ խումբը պարզել էր, որ հուլիսի 11-ի ժամը 16.00-ից հուլիսի 17-ի ժամը 14.00-ն ընկած ժամանակահատվածում անհայտ անձինք գողացել են հասարակական կազմակերպության՝ Ճամբարակ-Վարդենիս ճանապարհին գտնվող շենքի եվրոպատուհանների փեղկերը և ջեռուցման կաթսաներ:
Քրեական ոստիկանության գլխավոր վարչության, Գեղարքունիքի մարզային վարչության, Վարդենիսի, Գավառի և Մարտունու բաժինների ծառայողների համատեղ օպերատիվ-հետախուզական միջոցառումների արդյունքում պարզվել է գողությունը կատարողների ինքնությունը: Նախաձեռնված քրեական վարույթի շրջականներում սեպտեմբերի 2-ին խուզարկություն է կատարվել Վարդենիսի 31-ամյա բնակչի և Արեգունի գյուղի 28-ամյա բնակչի բնակարաններում և օժանդակ շինություններում: Խուզարկությամբ գողոնի մի մասը հայտնաբերվել է: Վարդենիսի բնակիչ 31-ամյա տղամարդու բնակարանի խուզարկությամբ հայտնաբերվել է նաև 5 փաթեթ՝ մոտ 44,87 գրամ կանեփանման զանգվածով, իսկ տնամերձ հողամասից հայտնաբերվել է կանեփի 168 բույս:
Նրանք ձերբակալվել և ներկայացվել են նախաքննական մարմին:
Նախաքննությունը շարունակվում է:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: