Գավառի քրեական հետախույզները բնակարանային գողություններ են բացահայտել. մեկ անձ ձերբակալվել է

Հունիսի 5-ի երեկոյան «1-02» ծառայություն էր զանգել Գեղարքունիքի մարզի Նորատուս գյուղի մի բնակիչ և հայտնել, որ եղբոր տնից գողություն են արել: Ահազանգը փոխանցվել էր ոստիկանության Գավառի բաժին, որտեղից էլ օպերատիվ խումբը մեկնել էր դեպքի վայր:
Ոստիկաններին ուղեկցելով եղբոր տուն` տղամարդը հայտնել էր, որ տնից գողացել են հեռուստացույց, էլեկտրական պտուտակահան ու սղոց:
Իրականացվեցին անհրաժեշտ գործողություններ, իսկ բաժնի քրեական հետախույզները, համագործակցելով վարչության գործընկերների հետ, ձեռնարկեցին օպերատիվ-հետախուզական միջոցառումներ: Արդեն հաջորդ առավոտ, գողությունը կատարելու կասկածանքով, Գավառ քաղաքից բերման ենթարկվեց 34-ամյա մի տղամարդ: Փաստերի ճնշման տակ նա ստիպված էր խոստովանել, որ մոտ 20 օր առաջ ինքն էր մտել Նորատուսի բնակչի տուն:
Իրավապահները պարզեցին ևս մեկ դրվագ, որի խոստովանությունը նույնպես չուշացավ: Օպերատիվ ճանապարհով ձեռք բերվեց տվյալ, որ 34-ամյա գավառցին այդ նույն ժամանակահատվածում, տեխնիկական միջոցի գործադրմամբ բացելով պատուհանը, մտել էր Նորատուս գյուղի մեկ այլ տուն և գողացել ջեռուցման կաթսա ու մարտկոցներ` պատճառելով մոտ 600 հազար դրամի վնաս:
Ձեռնարկվում են միջոցառումներ՝ գողոնը հայտնաբերելու ուղղությամբ:
34-ամյա տղամարդը ձերբակալվել է, հանգամանքները պարզվում են: