Համաքաղաքացու տնից գողություն կատարած տղամարդը հայտնաբերվեց. գողոնն առգրավվել է
![Համաքաղաքացու տնից գողություն կատարած տղամարդը հայտնաբերվեց. գողոնն առգրավվել է Համաքաղաքացու տնից գողություն կատարած տղամարդը հայտնաբերվեց. գողոնն առգրավվել է](/timthumb?src=/resources/police/img/news/big/1683273230-4666.jpeg&q=75&w=780&wm=1)
Մայիսի 2-ին ոստիկանության Արագածոտնի մարզի օպերատիվ կառավարման կենտրոն էր զանգել Ապարան քաղաքի մի բնակչուհի և հայտնել, որ տնից գողություն են արել: Մեկնած օպերատիվ խումբը պարզել է, որ ժամը 09.00-ից 12.30-ն ընկած ժամանակահատվածում Ապարան քաղաքի Բաղրամյան փողոցի նշված տան մուտքի տեսանելի հատվածում դրված բանալիով դուռը բացել և հյուրասենյակից գողացել են պլանշետ և նոթբուք:
Գողության փաստով քրեական վարույթ է նախաձեռնվել:
Ոստիկանության Ապարանի բաժնի քրեական հետախույզները ձեռնարկած օպերատիվ-հետախուզական միջոցառումների արդյունքում պարզել են, որ գողությունն արել է ապարանցի 41-ամյա տղամարդը: Ձեռնարկված միջոցառումների շնորհիվ Երևան քաղաքի Բագրատունյաց փողոցի մանրածախ առևտրի կետերից մեկում գողացված նոթբուքը և պլանշետը հայտնաբերվել և առգրավվել են:
Ոստիկանության Ապարանի բաժնի և Արագածոտնի մարզային վարչության քրեական հետախույզների համատեղ ձեռնարկած միջոցառումների արդյունքում մայիսի 4-ի ժամը 23.20-ին 41-ամյա տղամարդը Ապարան քաղաքի Բաղրամյան փողոցի շենքերից մեկի բակում հայտնաբերվել, ձերբակալվել և տեղափոխվել է Ապարանի բաժին:
Նա և կազմված փաստաթղթերը ներկայացվել են Արագածոտնի մարզային քննչական վարչություն:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: