Գողություններ և գողության փորձ. պարեկների և Կենտրոնականի ոստիկանների բացահայտումը

ՆԳՆ ոստիկանության ՊԾ 2-րդ գումարտակի 2-րդ վաշտի ծառայողները հուլիսի 1-ին, ժամը 03.05-ին, Հյուսիսային Ճառագայթ փողոցում հայտնաբերել, սառը զենք կրելու և պահելու հիմնավոր կասկածով ձերբակալել և ոստիկանության Արաբկիրի բաժին են տեղափոխել 17 և 18 տարեկան երկու երիտասարդի: Խուզարկությամբ նրանց մոտ հայտնաբերվել են ծալովի դանակ՝ 12 սմ շեղբի երկարությամբ, պտուտակահան և հարթաշուրթ: Ձեռնարկված օպերատիվ-հետախուզական միջոցառումների արդյունքում պարզվել է, որ նրանք փորձել են գողանալ ավտոմեքենայի կողային հայելիներ: Արարատի մարզի Այգեվան գյուղի բնակիչ երիտասարդները խոստովանական բացատրություն են տվել, որ մոտ 10 օր առաջ գողացել են Արշակունյանց պողոտայում կայանված «Մերսեդես» և «ՎԱԶ-2121» մակնիշի մեքենաների կողային հայելիները, իսկ մարտի վերջերին 17-ամյա երիտասարդը գողացել էր Շիրակի փողոցում կայանված «Մերսեդեսի» կողային հայելիները:
Կազմված փաստաթղթերն ուղարկվել են նախաքննական մարմին:
Ձեռնարկվում են միջոցառումներ՝ տուժողներին և գողոնը հայտնաբերելու ուղղությամբ:
Կատարվում է նախաքննություն: