Մեծամորի ոստիկաններն ու պարեկները հայտնաբերեցին մեքենան էլ, փախցնողին էլ

Փետրվարի 20-ի առավոտյան ժամը 6.30-ին Մեծամորի մի բնակիչ հաղորդում տվեց ոստիկանության Մեծամորի բաժնում. գիշերը գողացել էին «ՎԱԶ-2106» մակնիշի իր մեքենան, որի դռները կողպած են եղել:

Դեպքի վայր մեկնեց բաժնի օպերատիվ խումբը, տեղյակ պահվեցին նաև Արմավիրի մարզի պարեկները: Հանցագործությունը թարմ հետքերով բացահայտելու ուղղությամբ ձեռնարկած իրավապահների միջոցառումերն արդյունք տվին շատ արագ:

Հաղորդումից մոտ 15 րոպե անց, ժամը 6.45-ին, Արմավիրի մարզի Մարգարա գյուղի դաշտերում հայտնաբերվեց, հիշյալ գողությունը կատարելու հիմնավոր կասկածանքով ձերբակալվեց և ոստիկանության Մեծամորի բաժին տեղափոխվեց մշտական բնակության վայր չունեցող 61-ամյա մի տղամարդ: Բաժնում նա խոստովանեց, որ ավտոմեքենան գողացել է ինքը: Գողացված մեքենան հայտնաբերվել է: Պարզվեց նաև, որ տղամարդը նախկինում մի քանի անգամ դատապարտված եղել է նմանատիպ հանցագործությունների համար:

Իրավապահների հետագա միջոցառումներով պարզվեց նաև, որ փետրվարի 20-ի գիշերը Մեծամոր քաղաքի 1-ին թաղամասի տարածքում տղամարդը փորձել էր գողանալ «ՎԱԶ-2106» մակնիշի՝ երեք և «ՎԱԶ-2107» մակնիշի՝ մեկ մեքենա, սակայն իր կամքից անկախ` չէր կարողացել հանցագործություններն ավարտին հասցնել:

61-ամյա տղամարդը ներկայացվել է Արմավիրի մարզային քննչական վարչություն, ձերբակալվել և տեղափոխվել ձերբակալվածների պահման վայր: Նախաքննությամբ հանգամանքները պարզվում են: