ԱՄՆ արդարադատության դեպարտամենտի Թմրամիջոցների դեմ պայքարի վարչության կազմակերպած դասընթաց Երևանում

Հոկտեմբերի 25-ից 29-ը Երևանի «Մարիոթ» հյուրանոցում ԱՄՆ արդարադատության դեպարտամենտի Թմրամիջոցների դեմ պայքարի վարչության Թբիլիսիի ազգային գրասենյակի կողմից ՀՀ ոստիկանության ծառայողների, ինչպես նաև ԱԱԾ, քննչական կոմիտեի և ՊԵԿ աշխատակիցների համար անցկացվեց «Թմրանյութերի հետ կապված հանցագործությունների քննություն» թեմայով դասընթաց, որը վարում էին Թմրամիջոցների դեմ պայքարի վարչության ներկայացուցիչները։ Նախ ներկայացվեց թմրամիջոցների դեմ պայքարի վարչության տարածաշրջանի առաքելությունը, այնուհետև 5-օրյա դասերին քննարկվեցին տարածաշրջանում թմրամիջոցների տեղափոխման ուղղությունների, հետախուզության, սինթետիկ թմրամիջոցների, գաղտնի լաբորատորիաների, թմրամիջոցների արտադրության մեթոդների, փողերի լվացման, ստվերային ցանցի, տակտիկական բժշկության և այլ հարցեր:
Դասընթացն անցավ բուռն քննարկումների և աշխատանքային խմբի արդյունավետ գործունեությանը միտված առաջարկների մթնոլորտում։ Արդյունքում մասնակիցները ձեռք բերեցին մի շարք հմտություններ, որոնք կկարողանան կիրառել ամենօրյա աշխատանքում։
Հոկտեմբերի 27-ին ՀՀ ոստիկանության ՔՈԳՎ, շտաբի, ինչպես նաև Թմրամիջոցների դեմ պայքարի վարչության Թբիլիսիի ազգային գրասենյակի ներկայացուցիչների միջև տեղի ունեցավ հանդիպում, որի ընթացքում քննարկվեցին տեղեկատվության փոխանակմանն ու հետագա համագործակցությանն առնչվող հարցեր։
Հոկտեմբերի 29-ին միջոցառման փակման արարողությունն էր, որին մասնակցում էին նաև ՀՀ-ում ԱՄՆ դեսպան տիկին Լին Թրեյսին և ՀՀ ոստիկանության կրթահամալիրի պետի պարտականությունների ժամանակավոր կատարող, ոստիկանության փոխգնդապետ Մ. Մարկոսյանը։ Ավարտին միջոցառման մասնակիցները ստացան հավաստագրեր։