Թալինի ոստիկանների հակաթմրամիջոցային պայքարի դրվագներ

Թալինի քրեական հետախույզները ստացած օպերատիվ տեղեկությունն իրացրին բաժնի համայնքային ոստիկանների հետ: Ապօրինի թմրանյութ ձեռք բերելու, պահելու և իրացնելու կասկածանքով Արտենի գյուղում ձերբակալվեց և ոստիկանության Թալինի բաժին տեղափոխվեց 30-ամյա մի երիտասարդ: Քիչ անց իր տանը ձերբակալվեց նաև երիտասարդի 54-ամյա համագյուղացին: Նրա անձնական խուզարկությամբ հայտնաբերվել է դեղնականաչավուն զանգվածով կաթուցիչ:

54-ամյա տղամարդն էր երիտասարդին տվել թմրանյութ: Տղամարդը նաև խոստովանել է, որ վերջին ամիսներին մի քանի անգամ թմրանյութ է հյուրասիրել նաև մեկ այլ համագյուղացու. 32-ամյա երիտասարդի հետ միասին ծխել են:
Տղամարդը հայտնել է, որ անձնական օգտագործման համար տանը պահում է մարիխուանա, որը պատրաստել է իր տնամերձ հողամասում վայրի աճած կանեփից:
Նախաձեռնվել է քրեական վարույթ, և հաջորդ օրը 54-ամյա տղամարդու տանը կատարվել է խուզարկություն: Հայտնաբերված ապակե չորս տարայում կար ընդհանուր 128 գրամ, իսկ լվացքի մեքենայում եղած տոպրակում` 29 գրամ մարիխուանայի նմանվող զանգված:
Կանեփ աճեցնելու և թմրանյութ պահելու վերաբերյալ մի տեղեկություն էլ ստացել էին Թալինի համայնքային ոստիկանները: Այս տեղեկությունը Արագածոտնի մարզի Արտենի գյուղի մեկ այլ բնակչի մասին էր: Հունվարի 30-ին հայրենի գյուղում 58-ամյա տղամարդը ձերբակալվեց և տեղափոխվեց ոստիկանության Թալինի բաժին, որտեղ խոստովանեց, որ աճեցրել է կանեփ, որից էլ պատրաստել է թմրանյութ:
Նախաձեռնվեց քրեական վարույթ: Խուզարկությամբ տղամարդու տանը հայտնաբերվեցին ավելի քան 4 գրամ ափիոնի նմանվող զանգված, կանեփանման զանգված ու սերմեր:
Երկու դեպքով էլ հանգամանքները պարզվում են: