Արմավիրի մարզային վարչության ծառայողները թմրանյութ պահելու և օգտագործելու դեպքեր են բացահայտել

Հոկտեմբերի 21-ին ոստիկանության Արմավիրի մարզային վարչության քրեական հետախույզները ստացել էին օպերատիվ տեղեկություն, որ արմավիրցի 37-ամյա մի տղամարդ տան նկուղում և կից օժանդակ շինությունում կանեփից պատրաստված թմրամիջոց է պահում։
Նախաձեռնված քրեական վարույթի շրջանակում նշված հասցեում զննություն կատարվեց։
Նկուղից հայտնաբերվեցին դեղանականաչավուն չորացված, մանրացված զանգված՝ ընդհանուր մոտ 580 գրամ, և արմատախիլ արված կանեփի երկու բույս։ Թմրանյութ պահելու և օգտագործելու վերաբերյալ օպերատիվ տեղեկություն Արմավիրի մարզային վարչության քրեական հետախույզները ստացան նաև հոկտեմբերի 24-ին, համաձայն որի՝ Նոր Արմավիր գյուղի 57-ամյա մի բնակիչ կանեփ է աճեցնում, իսկ տանն ու կից օժանդակ շինություններում թմրանյութ է պահում: Դեպքի առթիվ նախաձեռնվեց քրեական վարույթ, որի շրջանակում նորարմավիրցու տան և կից օժանդակ շինություններում զննություն կատարվեց: Հացատան ակնհայտ տեսանելի մասում ոստիկանները նկատեցին դեղնականաչավուն զանգվածով լցված մեկ լիտր տարողությամբ ապակե տարա, որի քաշը 580 գրամ էր: Հայտնաբերվեց նաև թղթե չորս փաթեթ՝ ընդհանուր 7,21 գրամ քաշով: Տղամարդը հայտնել է, որ հայտնաբերվածը թմրանյութ է, պատրաստել է իր աճեցրած կանեփից: Երկու դեպքով էլ կազմված փաստաթղթերն ուղարկվել են Արմավիրի մարզային քննչական վարչություն: Նշանակվել են փորձաքննություններ: Նախաքննությամբ հանգամանքները պարզվում են: